Loron 26-27 Outubru: TL sai uma-na’in ba Konferénsia Ministru Justisa CPLP da-XIX
DILI, 19 Outubru 2026 (TATOLI)-Ministériu Justisa, Sérgio Hornai, hala’o enkontru ho Primeiru-Ministru, Kay Rala Xanana Gusmão, hodi atualiza preparasaun servisu Timor-Leste sai uma-na’in ba konferénsia entre ministrus justisa CPLP ba da-XIX ne’ebé sei hala’o iha loron 26-27 Outobru 2026.
“Iha oportunidade hasoru Primeiru-Ministru ne’e hodi informa progresu servisu ne’ebé Governu Konstitusionál da-IX hala’o ligadu ho konferénsia ministru justisa entre ministru justisa sira ne’ebé atu realiza iha Timor-Leste,” Ministru Justisa relata ba jornalista sira iha Palásiu Governu, ohin.
Konferénsia ne’e nu’udar kontinuasaun ida hanesan Estadu membru ne’ebé hetan fiar hanesan Prezidénsia CPLP nian, ne’ebé sira sei halo tuir medida prevensaun (kampaña dezaminasaun kona-ba krime transnasionál.
“Nune’e, agora daudaun sira halo hela ezersísiu no ohin ami mai relata ba Primeiru-Ministru kona-ba ita-nia prontidaun. Relatóriu progresu ne’ebé ita halo ho koordenasaun hamutuk liña ministeriál sira,” nia hateten.
Nia informa, konferénsia ne’e sei foka kona-ba krime organizadu sira ba iha scamming online ne’ebé resentimentu sira akontese iha ita-nia nasaun no rejiaun.
“Ita hili ida-ne’e sai hanesan tópiku importante ida tanba krime transnasionál la’ós eziste de’it iha Timor maibé iha Estadu membru hotu iha rejiaun no mundu sai preokupasaun ba ita,” nia subliña.
Tuir nia, reuniaun ne’e sira konsolida hanoin ida, polítika ida liuhusi lian portugés hodi haree Estadu membru sira-nia perspetiva solusaun saida mak halo hodi kontribui ba sosiedade ne’ebé dinámiku liuliu iha matéria penál kooperasaun internasionál nian.
“Tanba ne’e, Primeiru-Ministru orienta MJ atu halo servisu ida-ne’ebé koordenadu hodi bele fó susesu ba iha konferénsia ida-ne’e no hamosu deklarasaun ida hodi vinkula Estadu membru sira no sei haree mós planu sira-ne’ebé ita sei halo durante mandatu Prezidénsia CPLP nian,” nia dehan.
Jornalista : Alexandra da Costa
Editór : Cancio Ximenes
