MOP ezekuta OJE 2026 atinje ona 54%
DILI, 19 Outubru 2026 (TATOLI)—Ministru Obra Públika, Samuel Marçal, hateten ohin sira halo marka audiénsia ho Komisaun E ne’ebé trata asuntu infraestrutura, komérsiu no indústria, hodi ko’alia kona-ba ezekusaun OJE 2026 ne’ebé daudaun ne’e atinje 54%.
“Agora daudaun iha kapitál dezenvolvimentu atinje 27%, einjerál iha MOP 54% maibé ezekusaun boot liu ne’e iha fundu infraestrutura iha MOP, ne’ebé atinje 71%. Ha’u fiar katak to’o iha fulan-Dezembru bele atinje 90%,” Ministru Obra Públika, Samuel Marçal, relata ba jornalista sira iha Parlamentu Nasionál, ohin.
Ministru ne’e dehan, iha ezekusaun sira hasoru problema barak iha tereenu, problema ho krize mundiál liuliu presu alkatraun la’ós de’it folin sa’e maibé estoke mak laiha, sementu mós fulan hira liubá laiha estoké inklui kombustível.
“Nune’e, problema sira-ne’e hotu afeta ba iha ezekusaun maibé sira esforsu tanba iha pedidu pagamentu barak ne’ebé sira halo ona kimitmentu hodi hatuka ba Grande Projetu hodi hahú prosesu pagamentu,” nia dehan.
Nia hatutan, projetu implementasaun tarde uitoan ho material no ohin informa hotu ba PN, ne’ebé ezekusaun ne’e seidauk atinje progresu ne’ebé boot liu. Maibé sira fiar katak ho kompromisu obligasaun sira hotu ne’ebé daudaun ne’e iha, Ministériu Finansa no pedidu balun iha ADN hodi halo verifikasaun, entaun molok ramata tinan ne’e bele atinje 84%.
Iha sorin seluk, tuir Prezidente Komisaun E, Marcos Xavier, informa katak iha sesaun dadeer nian sira diskute de’it kona-ba ezekusaun OJE 2026 nian iha Ministériu Obra Públika.
“Entaun, MOP nia ezekusaun to’o agora foin mak atinje 54%. Iha saláriu vensimentu la’o di’ak hela maibé atraza uitoan iha bens servisu ligadu ho eviksaun (alargamentu) sira-ne’e,” nia dehan.
Maibé, deputadu ne’e dehan, ohin, Komisaun husu mós sira-nia alrgamentu iha Dili laran no iha munisípiu sira, no ohin MOP ho ekipa esplika kalaru katak sira indemniza ona afetadu sira, falta ida ka rua mak sei iha hela prosesu nia laran hela.
“Ho ida-ne’e mak sira-nia ezekusaun bens servisu ne’e kiik uitoan, afeta mós iha kapitál dezenvolvimentu ne’e haree ba klima. Prosesu aprovizionamentu tarde (47 dias), ne’ebé ohin ami husu ba MOP haree mekanizmu sira atu ita asina kontratu labele demora,” nia hateten.
Nia hatutan, problema seluk mak sosiál ne’ebé hetan impedimentu iha terrenu maibé sira garante katak molok tinan ne’e ramata, sira bele atinje to’o 80% tanba iha kompromisu ba obligasaun pagamentu nian.
Jornalista : Alexandra da Costa
Editór : Cancio Ximenes
