Prezidénsia Repúblika kontinua prioriza programa hitu iha tinan oin
DILI, 19 Outubru 2026 (TATOLI)-Prezidénsia Repúblika iha proposta Orsamentu Jerál Estadu (OJE) 2027 prevee millaun $11,3 hodi kontinua implementa programa hitu.
Xefe Kasa Sivíl Prezidénsia Repúblika, Henriqueta Maria da Silva, hatete prioridade ba tinan oin kontinua nafatin ho atividade ne’ebé hala’o iha tinan ne’e mak hanesan realizasaun kompetisaun xadres ne’ebé sei hala’o iha Dili, iha inísiu fulan 2027, konferiénsia Orasis iha Dili, ne’ebé sei serbisu hamutuk ho Vise-Primeiru Ministru ba Asuntu Ekonómiku no daudaun preparasaun la’o hela, Tour Timor, Dili Maratona Internasionál no kontinua atividade regulár dapur povu, atividade empoderamentu feto, no atividade sosiál.
“Aleinde ne’e, ita halo nafatin atividade relasaun internasionál liga ba asuntu bilaterál, multilaterál, ASEAN, CPLP ho seluk tan”, nia hatete hafoin ramata audiénsia públika ho Komisaun A ba Asuntu Konstitusionál no Justisa iha Parlamentu Nasionál, ohin.
Iha setór justisa, kontinua kolabora ho parte kompetente ba promulgasaun lei sira ne’ebé submete ba Prezidente Repúblika. “Kontinua atividade kondekorasaun no indultu”, nia dehan.
Iha proposta OJE 2027, Prezidénsia iha redusaun millaun $1, kompara ho tinan ne’e, tanba laiha verba alokasaun ba kapitál menór no dezenvolvimentu.
Tuir livru orsamentál ne’ebé Tatoli asesu, Prezidénsia Repúblika iha tinan fiskál 2027 prevee $11.858.312, ne’ebé destina ba saláriu no vensimentu $5.053.746, bens no servisu $5.749.467, no transferénsia públika $1.055.100.
Orsamentu ne’e finansia Programa Estadu Direitu Demokrátiku ho subprograma promosaun direitu umanu, Programa Funsionamentu no Dezenvolvimentu Institusionál ho subprograma rua. Programa Indentidade Nasionál ho subprograma apoiu promosaun lia-tetun, portugés hanesan dalen reforsu koezaun povu Timor-Leste. Programa Reforsa Relasaun no Kooperasaun Internasionál ho subprograma iha vizita ámbitu relasaun multilaterál.
Programa Fortalesimentu Demokrasia, Konstitusionalidade, Pás, Defeza no Seguransa ho subprograma tolu hanesan fortalesimentu demokrásia, asegura konstitusionalidade, garante pás no defeza ho seguransa.
Programa Inisiativa Dezenvolvimentu Prezidénsia Repúblika ho subprograma rua, inisiativa sosiál ho inisiativa kulturál no desportu no Programa Dezenvolve Sistema Komunikasaun Institusionál ho subprograma rua, fortalese relasaun internasionál bilaterál, relasaun multilaterál no asuntu eminente.
Durante audiénsia, Prezidénsia Repúblika mós aprezenta taxa ezekusaun OJE 2026, ne’ebé atinje millaun $9,5 ka ekivale 72,9%, husi montante inisiál millaun $12,2.
Jornalista: Nelson de Sousa
Editora: Maria Auxiliadora
