Universitas Negeri Surabaya no CDTL diskute kona-ba dezenvolvimentu siénsia desportiva
DILI, 19 Outubru 2026 (TATOLI)–Prezidente Konfederasaun Desportiva Timor-Leste (CDTL), Afranio Xavier Amaral, hamutuk ho Vise-Prezidente na’in rua, simu vizita servisu husi delegasaun Universidade Negeri Surabaya (UNESA) iha Indonézia, iha Salaun Enkontru CDTL, hodi diskute kona-ba dezenvolvimentu siénsia desportiva.
“Ami agradese tebes ho vizita husi akadémiku sira UNESA nian. Ami espera katak parseiru ida-ne’e bele fó benefísiu boot ba dezenvolvimentu desportu nasionál iha futuru,” Prezidente CDTL hateten hafoin ramata enkontru, segunda ne’e.
Iha diskusaun ne’e, parte rua ko’alia kona-ba bolsa estudu, formasaun treinadór, análize performa atleta no dokumentu kooperasaun entre CDTL no UNESA.
Delegasaun husi UNESA ne’e kompostu husi Nurkholis, dosente Treinamentu Desportivu, Siénsia Desportiva, hamutuk ho Abdul Hafidz, Vise-Dekanu Fakuldade Vokasionál, Programa Estudu Análize Performa Desportiva.
Enkontru ida-ne’e ho objetivu atu hametin relasaun kooperasaun no diskute oportunidade sira iha área siénsia desportiva (sport science), kapasitasaun rekursu umanu, no hadi’ak performa atleta sira iha Timor-Leste.
Jornalista : Hortêncio Sanchez
Editór : Cancio Ximenes
