Austrália-TL diskute kona-ba kombate peska illegál no krime transnasionál
DILI, 20 Outubru 2026 (TATOLI)—Austrália liuhusi Komandante Komandu Fronteira Marítima Austrália, Brett Stoner, hala’o enkontru ho Primeiru-Ministru, Kay Rala Xanana Gusmão, hodi diskute kona-ba seguransa no kombate peska ilegál iha fronteira marítima.
Komandante Komandu Fronteira Marítima Austrália, Brett Stoner, sente onradu tanba bele fila fali mai Timor-Leste, tanba hanesan parseiru forte ne’ebé servisu hamutuk hodi kombate peska ilegál no krime transnasionál
“Iha enkontru ne’e, ami diskute kona-ba atenjimentu balun entre servisu kooperasaun TL ho Austrália ne’ebé asina ona akordu iha tinan 2025 mak kona-ba seguransa fronteira marítima nian no mós área koletivu ne’ebé sei servisu hamutuk iha futuru mai,” Komandante ne’e relata ba jornalista sira iha Palásiu Governu, ohin.
Tuir nia, fronteira marítima entre TL ho Austrália ne’e área ne’ebé luan entaun presiza hametin liután no haforsa parséria, aleinde fronteira marítima iha mós área seluk hanesan iha aeroportu, imigrasaun no seguransa sibernétika.
“Peska ilegál hanesan ameasa boot ida ba Austrália no Timor-Leste. Tanba ne’e, sira koopera atu kombate asuntu ida-ne’e, tanba sei fó impaktu mós ba aspetu ekonómia nasaun nian-ne’ebé ohin loron iha enkontru ko’alia mós kona-ba ne’e,” nia dehan.
Jornalista : Alexandra da Costa
Editór : Cancio Ximenes
