DNCP seidauk serteza aumenta indústria resiklajen óleu foer tanba laiha demanda
DILI, 20 Outubru 2026 (TATOLI)—Dirasaun Nasionál Kontrolu Poluisaun (DNCP) seidauk iha serteza atu aumenta indústria resiklajen husi residu perígozu ka óleu foer (óleu uzadu) tanba demanda no estoke menus.
Diretór Nasionál Kontrolu Poluisaun, Arlindo Silveira, hateten estoke óleu uzadu atu fornese ba iha kompañia Panda iha Tibar ne’e tama iha kontratu ho durasaun tinan lima nia laran, maibé to’o ohin loron kompañia sira ladun hetan estoke óleu foer atu fornese ba sira-nia indústria resiklajen.
“Maibé sira tenke hatene katak ida-ne’e mak kondisaun iha Timor-Leste, no Governu mós laiha regra ka lei hodi halo esportasaun no importasaun óleu foer nian,” Diretór ne’e esplika iha Timor Plaza, ohin.
Tuir nia, kona-ba óleu foer ne’ebé laiha ne’e kestaun kompañia nian, tanba iha nia indústria kategória ho médiu tanba ne’e peodusaun ba óleu foer ne’e menus.
“Tanba ne’e, ita labele loke tan indústria resiklajen óleu foer tanba demanda laiha, no sira sei haree óleu foer sira-ne’ebé ofisina sira produs iha munisípiu sira hodi rekolla lori ba kompañia atu halo resiklajen,” nia subliña.
Enkuantu, nia dehan, kona-ba armazenamentu óleu foer agora daudaun sira iha tanke ida iha Alas, Munisípiu Manufahi hodi responde ba demanda sira-ne’ebé ba futuru sei uza ba mega projetu ne’ebé instala iha kosta súl.
Aleinde, iha loron 21 Setembru 2026 ne’e, Ministériu Turizmu no Ambiente (MTA), liuhusi Diresaun Nasionál Kontrolu Poluisaun, hala’o ona enkontru koordenasaun ho Autoridade Rejiaun Administrativa Espesiál Oekusi Ambeno (RAEOA) liuhusi Servisu Rejionál Terra no Propriedade. Enkontru ne’e foka ba planu konstrusaun tanke armazenamentu residu perigozu, partikularmente atu trata óleu fo’er (óleu uzadu) iha rejiaun laran.
Jornalista : Alexandra da Costa
Editór : Cancio Ximenes
