MAKLN planeia haloot restu mortál 5.360 iha tinan oin
DILI, 20 Outubru 2026 (TATOLI)-Ministériu Asuntu Kombatente Libertasaun Nasionál (MAKLN) sei haloot restu mortál 5.360 iha tinan oin.
Ministru Asuntu Kombatente Libertasaun Nasionál, Gil da Costa ‘Oan Soru’, hato’o kestaun ne’e bainhira halo audiénsia públika kona-ba proposta Orsamentu Jerál Estadu (OJE) 2027 ho Komisaun F ba Asuntu Saúde, Igualdade Jéneru no Inkluzaun Sosiál iha Parlamentu Nasionál, ohin.
Nia dehan iha proposta orsamentu tinan oin ministériu hetan alokasaun millaun $172, ho prioridade kontinua pagamentu pensaun ba kombatente sira, no sei haloot restu mortál iha Natarbora hamutuk 1.700, Bononaru 775, Iliomar 224, Ainaru 2.661, ba iha jardín eroi ne’ebé daudaun prepara hela no sei konklui iha tinan oin.
Durante audiénsia, ministru aprezenta proposta hodi halo mudansa dentru kategória orsamentál maibé la aumenta tetu atu utiliza ba prosesu haloot restu mortál.
“Ami husu atu muda montante millaun $2 husi transferiénsia públika ba kapitál dezenvolvimentu, tanba bainhira haloot restu mortál iha jardín hirak ne’e kompañia mak halo”, nia hatete.
Tuir livru orsamentál, ba tinan oin MAKLN prevee $172.411.950 hodi aloka ba saláriu no vensimentu $1.584.358, bens no servisu $7.642.642, transferénsia públika $162.194.349, no kapitál dezenvolvimentu $990.601. Verba ne’e atu finansia programa funsionamentu no dezenvolvimentu institusionál ho subprograma rua. Programa inkluzaun sosiál ho subprograma haat hanesan rekoñesimentu no valorizasaun luta libertasaun nasionál, protesaun sosiál ba kombatente sira, infraestrutura, bolsa estudu.
Durante audiénsia aprezenta mós ezekusaun OJE 2026 ministériu ne’ebé atinje 69% husi orijen millaun $199.
Jornalista: Nelson de Sousa
Editora: Maria Auxiliadora
