Tinan 2027: MOP prevee millaun $251 ba tinan 2027 prioriza ba infraestrutura
DILI, 19 Outubru 2026 (TATÓLEU)—Ministériu Obra Públika (MOP), iha tinan 2027, sei prevee millaun $251 iha Orsamentu Jerál Estadu (OJE) 2027 ne’ebé sei fó prioridade ba infraestrutura liuliu ponte, estrada, bee-moos no eletrisidade..
Husi orsamentu ne’e, MOP aloka ba kapitál dezenvolvimentu millaun $9, saláriu vensimentu millaun $8.8 no bens servisu millaun $7 ne’ebé ho ninia totál ne’e hamutuk millaun $251-resin inklui ho transferénsia públika husi orsamentu EDTL, E.P ninian hamutuk millaun $123.
“Tinan oin laiha projetu foun, barak liu ba projetu reaprotesaun de’it (antesipa emerjénsia) tanba ne’e sira laiha proposta adisionál ba tinan oin,” Ministru Obra Públika, Samuel Marçal, relata ba jornalista sira hafoin hala’o audiénsia públika ho Komisaun E ne’ebé trata asuntu infraestrutura, komérsiu no indústria iha Palásiu Governu, ohin.
Tuir nia, maske mandatu Governu Konstitusionál da-sia (IX) besik atu ramata ona maibé ninia mandatu mak tun enkuantu Governu kontinua nafatin ba oin, entaun servisu ne’ebé halo la’ós haree de’it ba mandatu ida-ne’e.
“MOP ninia planu ne’e ba tinan lima dala ida, la’ós halo de’t ba tinan ida-ne’e, lae. Ne’ebé imi hotu hatene MOP nia prioridade mak iha kestaun tolu hanesan estrada ponte, eletrisidade no bee moos,” nia relata.
Governante ne’e dehan, eletrisidade iha nivel suku atinje hotu ona, nivel aldeia hela 193 mak seidauk asesu maibé kontratu la’o hotu ona. Pakote 30 mak iha prosesu aprovizionamentu, entaun to’o meadu tinan 2027 bele konklui hotu.
“Ne’ebé ha’u fiar katak meadu tinan oin ne’e nive aldeia bele konklui ona, enkuantu uma ida ka rua mak hela iha foho ita sei bele atende ho solár panel,” nia dehan.
Enkuantu, tuir nia bee-moos ne’e depende ba rekursu bee, ne’ebé sira foku hela ba postu sira, no iha postu 19 mak konklui ona maibé iha área rurál ne’e kobre ba Ministériu Administrasaun Estatal nian (SMASA).
Iha sorin seluk, Prezidente Komisaun E, Marcos Xavier, informa katak 2027 MOP nian
orsamentu aumenta iha kapitál dezenvolvimentu tanba tinan oin sei realiza eleisaun prezidensiál, kamára munisipál no iha 2029 Timor-Lests sei sai uma-na’in ba ASEAN.
“Tina oin sira laiha projetu foun maibé orsamentu ne’ebé aloka atu ezekuta ba servisu 2026 nian ne’ebé balun asina ona kontratu no balun sei iha prosesu aprovizionamentu, signifika planu 2026 nian mak atu implementa iha 2027,” nia esplika.
Nune’e, nia dehan, Komisaun iha rekomendasaun ba MOP atu aselera projetu sira-ne’ebé lansa ona hodi kontinua ba faze implementasaun.
Jornalista : Alexandra da Costa
Editór : Cancio Ximenes
