g7+ ezekuta 97% husi OJE 2026
DILI, 21 Outubru 2026 (TATOLI) – Sekretaridu g7+ ezekuta ona 97% husi Orsamentu Jerál Estadu (OJE) 2026 ne’ebé aloka ho montante millaun $2.
“Komisaun B fó sira-nia apresiasaun boot tebes ba g7+ nia nevel ezekusaun ne’ebé aas tebes. Até Dezembru mai sei ezekuta 100%”, Sekretáriu Jerál g7+, Helder da Costa, hatete hafoin ramata audiénsia públika ho Komisaun B ba Asuntu Negósiu Estranjeiru, Defeza no Seguransa, iha Parlamentu Nasionál, ohin.
Nia dehan progresu serbisu ne’ebé alkansa iha tinan ne’e tuir moto g7+ nian mak atu “Promove Pás iha Estadu-membru”.
Drijente ne’e hatete Timor-Leste orgullu nu’udar fundadór ba organizasaun referida, inklui ninia índise pás di’ak tebes iha rejiaun Ásia Pasífiku, no ida -ne’e rai sira seluk haree admira, enkuantu país membru sira seluk enfrenta difikuldade no konflitu.
Helder realsa katak ezekusaun orsamentu ne’ebé iha ne’e finansia atividade sira, konsolida nafatin Estadu-membru sira hodi promove pás.
Nia partilla mós ba deputadu sira kona-ba mundu ohin loron hasoru hela situasaun inserteza, iha konflitu iha médiu oriente ho país balun iha Europa, no Áfrika.
“Deputadu sira apresia tebes. Ezisténsia g7+ tinan 16 nia impaktu [no] benefísiu ba [ Timor-Leste] ba médiu no longu prazu, ho investimentu susesivu husi Governu no Parlamentu fó ba g7+ mak nia impaktu agora iha nivel multilateralizmu. Ita-nia naran agora sai prestijiadu iha nivel internasionál”, nia dehan.
Deputadu sira husu atu mantein programa organizasaun iha nivel internasionál hodi vizualiza Timor-Leste nia naran.
Helder hatete g7+ iha proposta OJE 2027 hetan alokasaun millaun $2, ho programa prioridade mak kontinua promove pás, diálogu iha rai-laran ho Estadu-membru sira seluk.
Aleinde ne’e, sei serbisu hamutuk ho Ministériu Negósiu Estranjeiru no Kooperasaun (MNEK) atu halo diseminasaun ba informasaun iha nasaun membru Asosiasaun Nasaun Sudeste Aziátiku (ASEAN, sigla inglés), kona-ba Timor-Leste nia prontidaun atu lidera prezidénsia ASEAN iha 2029 hodi promove país nia kapasidade ein termu organizadór.
Iha mós programa promosaun mediasaun ba pás, realiza jogu futsál ba foinsa’e iha munisípiu sira, diálogu ho foinsa’e, no atividade sira seluk nivel internasionál, rejionál no multilaterál.
Lembra katak, g7+ harii iha tinan 2010 iha Dili, nu’udar organizasaun intergovernamentál ida ne’ebé halibur nasaun 20 ne’ebé afetada husi konflitu no frajilidade, ho misaun atu promove pás, estabilidade, no hametin instituisaun Estadu-membru sira nian.
Organizasaun ne’e foka nia atividade iha área prioridade tolu – advokasia internasionál ba harii dame no Estadu; kooperasaun frajilidade ba frajilidade liuhusi fahe esperiénsia entre nasaun membru sira; no fortalesimentu instituisionál.
Sekretaria Jerál nia sede iha Dili no mantein mós nia eskritóriu iha Lizboa, Portugál (inaugura iha 2017) no Nova Iorke (iha Setembru 2024).
Jornalista: Nelson de Sousa
Editora: Maria Auxiliadora
