Governu aprova alterasaun lei ba investimentu privadu
DILI, 21 Outubru 2026 (TATOLI)—Governu aprova projetu Proposta-Lei kona-ba alterasaun dahuluk ba Lei n.º 15/2017, loron 23 fulan-Agostu, Lei Investimentu Privadu, ho objetivu atu reforsa kondisaun sira hodi atrai projetu investimentu nian no reinvestimentu ho dimensaun boot no mós ne’ebé iha interese estratéjiku ba dezenvolvimentu Timor-Leste.
Proposta ne’e mantén rejime jerál ba konsesaun benefísiu fiskál no insentivu aduaneiru no mós introdús rejime espesífiku ida ba projetus investimentu ka reinvestimentu nian ne’ebé konsidera iha interese nasionál boot, iha ámbitu Planu Estratéjiku Dezenvolvimentu.
Sekretáriu Estadu Komunikasaun Sosiál, Expedito Dias Ximenes, hateten proposta ida-ne’e aprezenta direta husi Primeiru-Ministru ho objetivu atu dada investór sira hodi lori projetu ho investimentu boot mai iha ita-nia nasaun.
“Atu nune’e bele ajuda reforsa ita-nia prosesu dezenvolvimentu ne’ebé daudaun ne’e la’o hela”, Sekretáriu Estadu ne’e informa ba jornalista sira iha Palásiu Governu, ohin.
Hanesan invetór balun husi Japaun, tuir nia, agora daudaun atu halo investimentu boot kona-ba konstrusaun estaneoru ró nian iha Manatutu-Laleia.
Nune’e, nia dehan, ida-ne’e proposta kona-ba lei normalmente Governu sei lori ba Parlamentu Nasionál hodi hetan aprovasaun no alteira lei investimentu privadu ne’ebé iha toha ona.
“Ba projetu sira-ne’e, benefísiu sira bele fó ba tinan 25, ne’ebé renovavel ba períodu hanesan, liuhusi rekoñesimentu husi Rezolusaun Governu nian, ho konsiderasaun ba dimensaun ka natureza investimentu nian no mós ninia impaktu ekonómiku, sosiál, ambientál ka teknolójiku,” nia dehan.
Nia hatutan, diploma ne’e mós klarifika no dezenvolve rejime kona-ba akordu espesiál sira investimentu nian, hodi estabelese ho detallu liután kondisaun sira ba ninia selebrasaun nomós kompromisu husi investidór sira, liuliu kona-ba kriasaun empregu ba traballadór timoroan sira no sira-nia formasaun profisionál, akizisaun bein no servisu husi fornesedór lokál sira, protesaun ba ambiente, no mós apoiu ba komunidade lokál.
Aleinde ne’e, estabelese mós garantia ba estabilidade jurídika no fiskál relasiona ho benefísiu sira-ne’ebé fó, sein prejuizu ba aplikasaun regra interese públiku nian, no mós reforsa mekanizmu sira monitorizasaun no fiskalizasaun nian ba projetu no konsekuénsia sira karik iha inkumprimentu, inklui posibilidade atu hakotu akordu no lakon benefísiu sira-ne’ebé fó.
Jornalista : Alexandra da Costa
Editór : Cancio Ximenes
