Governu aprova roteiru nasionál ba implementasaun kompromisu ekonómiku ASEAN 2026-2030
DILI, 21 Outubru 2026 (TATOLI)—Governu liuhusi reuniaun Konsellu Ministrus, kuarta ne’e, aprova Roteiru Nasionál ba Implementasaun Kompromisu Ekonómiku ASEAN nian ba 2026-2030, ne’ebé aprezenta husi Ministru Negósius Estranjeirus no Kooperasaun, Bendito dos Santos Freitas no Vise-Ministra ba Asuntus ASEAN, Milena Maria da Costa Rangel.
Sekretáriu Estadu Komunikasaun Sosiál, Expedito Dias Ximenes, hateten roteiru ida-ne’e estabelese kuadru nasionál ba orientasaun no koordenasaun atu garante implementasaun, ho forma koordenada no fazeada (tuir faze), ba kompromisus ekonómikus ne’ebé Timor-Leste halo ona iha ASEAN nia laran durante períodu husi 2026 to’o 2030, hodi define prioridade, asaun, no responsabilidade institusionál sira.
“Tanba bainhira ita sai tiha ona membru plenu ba ASEAN, roteiru ne’e akompañia husi planu estratéjiku setorál 19 husi 2026-2030 no planu traballu setorál mós 19 2026-2027,” Sekretáriu Estadu ne’e hateten ba jornalista sira iha Palásiu Governu.
Tuir nia roteiru ne’e mós bele transforma kompromisu sira sai realidade, reforma no ho asaun konkreta ba iha setór oioin liuliu ekonómia.
Nune’e, deliberasaun ne’e determina katak ministériu, instituisaun sira no entidade públika sira seluk ne’ebé envolve tenke asegura ezekusaun ba asaun sira-ne’ebé prevee ona iha ida-idak nia área responsabilidade nian.
Enkuantu Ministériu Negósiu Estranjeiru no Kooperasaun, ho koordenasaun husi Vise-Ministra ba Asuntus ASEAN, ne’ebé responsável atu garante koordenasaun jerál, akompañamentu, koordenasaun no konsolasaun ba progresu sira ne’ebé hetan ona iha implementasaun ba Roteiru.
Nia hatutan, kona-ba entidade responsavel sira tenke fornese beibeik informasaun kona-ba progresu implementasaun medida sira-nian, ne’ebé inklui progresu ne’ebé atinje ona, obstákulus ne’ebé identifika ona, no mós medidas ne’ebé propoin atu rezolve obstákulu sira ne’e.
“Roteiru sei sujeita mós ba monitorizasaun no revizaun periódika, hodi konsidera evolusaun kompromisu sira Timor-Leste nian iha ámbitu ASEAN, desizaun husi ninia órgaun kompetente sira, no mós prioridade nasionál,” nia dehan.
Ho desizaun ida-ne’e, Governu hanoin atu garante aproximasaun nasionál ida-ne’ebé koordenada no koerente hodi kumpre kompromisu ekonómiku sira ne’ebé halo ona iha ámbitu ASEAN nian no hodi aprofunda partisipasaun Timor-Leste nian iha Komunidade Ekonómika ASEAN nian.
Jornalista : Alexandra da Costa
Editór : Cancio Ximenes
