KM aprova ajustamentu temporáriu ba folin unitáriu husi produtu petrolíferu- simentu

DILI, 21 Outubru 2026 (TATOLI)—Iha reuniaun Konsellu Ministru (KM), kuarta ne’e, aprova ajustamentu temporáriu ba folin unitáriu referénsia nian husi produtu petrolíferu no simentu ne’ebé uza iha ezekusaun obra públika, haree ba aumentu husi kustu materiál hirak ne’e iha merkadu nasionál no internasionál, asosiadu ho konflitu armadu iha Europa no Médiu Oriente.

Deliberasaun ne’e determina katak Ajénsia Dezenvolvimentu Nasionál, Institutu Públiku (ADN, I.P) atualiza folin referénsia, konsidera valór husi $1,65 kada litru kombustível nian, $5 kada saku simentu nian no $1,25 kada kilograma husi material betuminozu nian.

Sekretáriu Estadu Komunikasaun Sosiál, Expedito Dias Ximenes, hateten ohin mós Ministru Obra Públika, Samuel Marçal, aprezenta proposta ida kona-ba ajustamentu presu materiál konstrusaun nian.

“Hanesan ita hotu hatene katak ida-ne’e impaktu husi funu iha médiu oriente halo presu ba materiál konstrusaun sira sa’e makaas, tanba ne’e mak ohin MOP aprezenta proposta ne’e ba Konsellu Ministru,” Sekretáriu Estadu Komunikasaun Sosiál, Expedito Dias Ximenes. Hateten ba jornalista sira iha Palásiu Governu, ohin.

Proposta proposta ne’e fó biban ba emprezáriu iha área infraestrutura sira atu estabiliza presu tuir kondisaun atuál.

Enkuantu, medida ne’e ho objetivu atu adapta kustu obra públika nian ho realidade merkadu nian, evita suspensaun projetu nomós garante kontinuidade no kualidade konstrusaun infraestrutura públika nian.

Aleinde ne’e, nia dehan, ADN mós iha responsabilidade atu akompaña beibeik dezenvolvimentu folin ba sasán sira-ne’e no halo ajustamentu nesesáriu sira hodi proteje interese Estadu nian no empreza sira-ne’ebé envolve.

Jornalista : Alexandra da Costa

Editór        : Cancio Ximenes