Konstrusaun edifísiu pediatria andar lima iha HNGV atinje ona 100%
DILI, 21 Outubru 2026 (TATOLI)—Ministra Saúde (MS), Elia dos Reis Amaral, hateten konstrusaun edifísiu pediatria andar lima iha Hospitál Nasionál Guido Valadares (HNGV) atinje ona 100%
“Konstrusaun edifísiu pediatria andar lima iha Hospitál Nasionál Guido Valadares (HNGV) ramata ona, maibé ita hare katak kuantidade ospital ne’e tanba sei iha faze instalasaun ekpamentu,” Elia dos Reis Amaral dehan ba jornalista sira iha Palasiu Governu, ohin.
Nia hateten, stand ring eletrisidade ho kWh (Kilowatt-hour) mesak ba pediatria, nune’e labele iha problema ba ahi hodi bele reponde ba HNGV ne’e rasik.
“Ita mós halo konektividade husi oksijéniu PSA ne’ebé tau ona iha ospital kotuk ita-boot sira bele ba haree ne’e ita halo instalasaun oksijéniu ba kada piju ospital ne’ebé mak ita atu operasionaliza ba,” nia hateten.
Antes ne’e Ministra Saúde, Elia dos Reis Amaral, informa progresu kosntrusaun edifísiu pediatria andar lima iha Hospitál Nasionál Guido Valadares (HNGV) atinje ona 98%.
“Ita-nia progresu konstrusaun edifísiu pediatria andar lima iha HNGV daudaun ne’e atinje ona 98% konstrusaun, agora daudaun faze ba instalasaun ekipamentu, tanba instalasaun ne’e la’ós loron ida ka rua maibé ne’e presiza tempu,” Ministra Elia dos Reis Amaral informa.
Governante ne’e esplika, ekipa sira daudaun ne’e halo ona instalasaun ba ekipamentu hanesan eletrisidade, bee-moos no sira seluk tan entaun sei garante ba tinan naruk.
“Tanba ne’e, ita hotu hein, tinan ne’e ita sei halo inaugurasaun ba edifísiu pediatria andar lima iha HNGV,” nia dehan.
Entertantu, konstrusaun edifisiu pediatria andar lima iha HNGV ne’e konstrui husi empreza China Civil Engineering Construction Corporation (CCECC) ne’ebé Governu Konstitusionál da-ualu (VIII) liuhusi Ministériu Saúde kontrata ho orsamentu hamutuk millaun $9,5.
Jornalista : Felicidade Ximenes
Editór : Cancio Ximenes
