MESSK komprometidu solusiona kestaun vistu ba estudante sira iha Indonézia
DILI, 21 Outubru 2026 (TATOLI) – Vise-Primeiru Ministru ba Asuntu Sosiál no Ministru Interinu Ensinu Superiór, Siénsia no Kultura (MESSK), Mariano Assanami Sabino, dehan daudaun ko’alia hela ho Governu Indonézia, liuliu Ministériu Edukasaun Indonézia, hodi buka solusaun kona-ba estensaun vistu ba estudante timoroan sira iha Indonézia.
Assanami hatete katak ministériu iha ona akordu konkordánsia ne’ebé sei asina iha tempu badak. Aleinde ne’e, ekipa sei hala’o vizita bá Indonézia atu trata diretamente kestaun estensaun vistu ba estudante timoroan sira, tanba problema ne’e kle’ur ona no seidauk hetan solusaun definitiva.
“Kitas, ita iha ona konkordánsia. Iha ona esbozu ho Ministériu Ensinu Superiór Indonézia, liuliu atu haree ida-ne’e. Proposta ne’ebé ita hato’o tenke selu dala-ida ho osan ki’ik. Tinan haat lisensiatura nian, tinan tolu doutoramentu, mestradu tinan rua, fó prazu to’o eskola ramata”, nia hatete hafoin ramata audiénsia públika kona-ba proposta Orsamentu Jerál Estadu (OJE) 2027 ho Komisaun G ba Asuntu Edukasaun, Juventude, Desportu, Kultura no Sidadania, iha Parlamentu Nasionál, ohin.
País sai ona membru ASEAN no diskute kestaun ne’e hodi fasilita movimentu sidadaun sira. Nia dehan, ministériu iha proposta orsamentu tinan oin atu tau atensaun mós ba reforsa serbisu adidu sira hodi responde ba preokupasaun ne’ebé iha.
Aleinde ne’e, MESSK iha modalidade oioin ne’ebé hakarak atu halo koordenasaun ho Ministériu Justisa atu fasilita renovasaun pasaporte bá to’o Indonézia.
Assanami rekomenda kada estudante sira atu bá eskola iha li’ur tenke hetan pasaporte foun ho validasaun to’o tinan lima no sanulu to’o ramata eskola.
“Tanba pasaporte ne’e direitu povu nian no folin bele hatún no fasilita sidadaun hetan lalais”, katak.
Notísia relevante: http://Komisaun G husu MNEK ko’alia ho Indonézia atu solusiona kestaun vistu ba estudante
Jornalista: Nelson de Sousa
Editora: Maria Auxiliadora
