MKI-Korea Súl sei selebra akordu iha área propriedade intelektuál

DILI, 21 Outubru 2026 (TATOLI)—Ministru Komérsiu no Indústria, Filipus Nino Pereira, aprezenta ba Konsellu Ministru Memorandu Entendimentu ne’ebé sei asina entre Ministériu Komérsiu no Indústria Timor-Leste no Ministériu Propriedade Intelektuál Repúblika Korea (Korea Súl), ho objetivu atu hametin kooperasaun bilaterál iha área propriedade intelektuál.

Sekretáriu Estadu Komunikasaun Sosiál, Expedito Dias Ximenes, hateten ohin Konsellu Ministru rona aprezentasaun ida husi Ministru Komérsiu no Indústria, Filipus Nino Pereira, kona-ba memorandu entendimentu entre Timor-Leste ho Korea Súl.

“Memorandu ida-ne’e atu hametin liután ita-nia kooperasaun bilaterál entre Timor-Lests ho Korea Súl iha área propriedade intelektuál,” Expedito Dias Ximenes hateten ba jornalista sira iha Palásiu Governu, ohin.

Tanba ne’e, nia haktuir akordu ne’e estabelese kuadru ida ba kooperasaun ho objetivu atu haforsa kapasidade institusionál Timor-Leste nian iha área ida-ne’e, liuhusi fahe koñesimentu no esperiénsia sira, formasaun ba tékniku sira nomós interkámbiu pesoál espesializadu sira.

Aleinde ne’e, tuir nia, memorandu ne’e prevee mós kooperasaun hodi dezenvolve polítika no lejizlasaun, proteje direitu propriedade intelektuál nomós hodi promove ninia utilizasaun ekonómika inklui komersializasaun produtu no inovasaun.

Jormalista : Alexandra da Costa

Editór         : Cancio Ximenes