UNICEF apoia jornalista 39 tuir formasaun kobertura mudansa klimátika
DILI, 21 Outubru 2026 (TATOLI) – Ajénsia Nasaun Unida ba Labarik (UNICEF-Sigla Inglés) fó formasaun kona-ba kobertura mudansa klimátika ba jornalista na’in 39 husi órgaun komunikasaun sosiál sira iha Timor-Leste.
Formasaun ne’e hala’o durante loron rua, husi 21 to’o 22 Outubru 2026, iha edifísiu Correios de Timor-Leste, Kintal-boot, Dili.
Formasaun ne’e ho objetivu atu hasa’e koñesimentu no kapasidade jornalista sira nian atu halo kobertura no reportajen kona-ba mudansa klimátika, liuliu ninia impaktu ba direitu no moris labarik sira nian.
Reprezentante UNICEF iha Timor-Leste, Patrizia DiGiovanni, iha ninia abertura hateten órgaun komunikasaun sosiál iha papél importante atu ajuda públiku komprende kona-ba risku, impaktu no solusaun sira relasiona ho mudansa klimátika.
Nia esplika katak mudansa klimátika la’ós de’it kona-ba aumentu temperatura ka dezastre naturál, maibé mós afeta família sira nia asesu ba bee-moos no ai-han, no iha impaktu ba agrikultura, edukasaun no saúde labarik sira nian.
Nia enkoraja jornalista sira atu halo reportajen bazeia ba evidénsia no fonte lokál, hodi hatudu situasaun real ne’ebé komunidade sira enfrenta, inklui falta bee-moos, mudansa iha padraun udan-been, inundasaun no bailoro naruk.
Tuir DiGiovanni, reportajen kona-ba mudansa klimátika la bele foka de’it ba problema sira, maibé tenke fó atensaun mós ba solusaun, hanesan uza enerjia renovável, hadi’a jestaun bee, promove agrikultura sustentável no hametin reziliénsia komunidade sira nian.
Nia mós husu jornalista sira atu tau labarik no joven sira iha sentru reportajen, atu asegura katak sira-nia esperiénsia, nesesidade no opiniaun hetan atensaun iha diskusaun públika kona-ba mudansa klimátika.
Enkuantu, Diretór-Jerál Sekretaria Estadu ba Komunikasaun Sosiál (SEKOMS), Florindo da Costa, hato’o agradese ba UNICEF tanba organiza no fasilita formasaun ne’e ba jornalista sira.
“Lori SEKOMS nia naran, hau agradese ba UNICEF nia apoiu ba formasaun mudansa klimátika no husu ba jornalista sira atu aproveita treinamentu ida-ne’e, hodi bele aplika koñesimentu ne’ebé sira hetan iha terrenu bainhira halo kobertura kona-ba asuntu mudansa klimátika iha Timor-Leste,” nia dehan.
Formasaun ne’e hetan apoiu husi Governu Repúblika Korea liuhusi Ajénsia Kooperasaun Internasionál Korea (KOICA), ne’ebé apoia programa mudansa klimátika iha Timor-Leste.
UNICEF hein katak, liuhusi treinamentu ne’e, jornalista sira bele hadi’a kualidade reportajen kona-ba mudansa klimátika no liga koñesimentu ne’ebé sira hetan iha formasaun ho realidade iha terrenu.
Inisiativa ne’e mós parte ida husi esforsu atu hametin asesu públiku ba informasaun ne’ebé loos no fiável, no promove asaun hamutuk hodi harii futuru ne’ebé seguru no sustentável ba labarik hotu iha Timor-Leste.
Jornalista: Camilio de Sousa
Editór: Filomeno Martins
