Festival Fronteira 2026 : Timor-Leste simu delegasaun Indonézia hodi hametin relasaun fronteira

LAUTÉM, 22 outubru 2026 (TATOLI) — Governu Timor-Leste organiza jantar hamutuk hodi simu delegasaun husi Indonézia, liuliu husi Nusa Tenggara Timur (NTT) no Maluku, iha Suku Com, Postu Administrativu Lautém, Munisípiu Lautém, kinta ne’e, nu’udar parte husi atividade Festival Fronteira 2026, ne’ebé hala’o ba dala haat.

Atividade ne’e sai momentu importante atu hametin relasaun amizade, fraternidade no kooperasaun entre komunidade sira iha área fronteira Timor-Leste no Indonézia, liuhosi interkámbiu kulturál no diálogu entre delegasaun hosi nasaun rua.

Ministru Administrasaun Estatál (MAE), Tomás do Rosário Cabral, iha nia intervensaun, hato’o agradesimentu ba delegasaun Indonézia ne’ebé partisipa iha festival ne’e, inklui reprezentante Governu NTT, Maluku Barat Daya, Kisar, Alor no Lirang.

“Ha’u, hodi naran Governu Timor-Leste no governu lokál sira, hato’o agradesimentu ba delegasaun Indonézia ne’ebé mai iha ne’e. Bem-vindu, ida-ne’e ita hotu nia fatin, no ita-nia relasaun bazeia ba ligasaun fronteira ne’ebé eziste,” dehan Ministru Tomás Cabral.

Nia esplika katak Festival Fronteira ne’e rezultadu husi servisu hamutuk entre instituisaun governamentál sira, liuliu Sekretaria Estadu Arte no Kultura, hodi promove relasaun di’ak entre komunidade sira iha fronteira.

Tuir Ministru, festival ne’e hahú iha Munisípiu Bobonaro iha 2023, kontinua ba Oé-Cusse iha 2024, Covalima iha 2025, no tinan 2026 hala’o iha Munisípiu Lautém.

“Festival ida-ne’e atu hametin fila fali ita-nia relasaun iha área fronteira. Aban, senhór Primeiru-Ministru sei ko’alia kona-ba tasi azul, atu ita hotu bele hamutuk tau matan ba limpeza iha área tasi-ibun,” nia dehan.

Ministru Tomás Cabral mós hato’o agradesimentu ba ekipa Fronteira Marítima, Oceano Azul, embaixadór no nia ekipa, tanba kontribuisaun ba organizasaun festival, liuliu iha promosaun konservasaun biodiversidade marinha no protesaun ambiente.

Nia hateten katak atividade festival nian sei fó atensaun ba importánsia konservasaun biodiversidade, limpeza tasi no esforsu atu hamenus uza plástiku.

Aleinde ne’e, ministru husu ba Autoridade Munisipál Lautém no komunidade lokál atu kontinua promove limpeza no kuidadu ba ambiente, maski festival remata ona.

“Festival la’ós remata iha ne’e. Festival hotu tiha, Prezidente Autoridade Lautém maka sei sai na’in ba festival, atu kontinua limpeza rai ne’e,” nia afirma.

Nia mós husu apoiu husi membru Governu no instituisaun relevante sira atu kontinua hametin partisipasaun komunidade iha atividade protesaun ambiente.

Iha oportunidade hanesan, Primeiru-Ministru, Kay Rala Xanana Gusmão, hato’o liafuan boas-vindas ba delegasaun Indonézia husi NTT no Maluku, no manifesta nia kontente tanba bele hasoru delegasaun no komunidade sira iha Com.

“Bemvindu. Kontente tebes tanba bele hare’e ema barak iha ne’e,” PM Xanana iha nia diskursu.

Xanana Gusmão mós husu deskulpa ba delegasaun sira tanba nia to’o tarde ba atividade jantar hamutuk, no hein katak durante loron tolu festival nian, partisipante sira bele aproveita oportunidade atu ko’alia no hametin relasaun entre malu.

“Espera durante loron tolu nia laran ita bele koalia ba malu no hase malu ho diak,” Nia dehan.

Primeiru-Ministru haksolok haree partisipasaun komunidade barak husi Com, no informa katak iha loron tuirmai sei iha oportunidade atu ko’alia kle’an liután kona-ba asuntu sira ne’ebé relevante ba festival.

Durante jantar hamutuk ne’e, komisaun organizadora mós fahe sertifikadu apresiasaun ba empreza no entidade sira ne’ebé fó apoiu ba realizasaun Festival Fronteira 2026, inklui East Timor Trading, Salimagu, Metrolink no patrosinadór sira seluk.

Atividade ne’e mós akompaña ho múzika kulturál, ne’ebé sai parte husi programa simu delegasaun Indonézia no promove interkámbiu kulturál entre komunidade sira.

Festival Fronteira 2026 ne’e nu’udar edisaun da-haat, depois edisaun dahuluk hala’o iha Bobonaro (2023), daruak iha Oé-Cusse (2024) no datoluk iha Covalima (2025).

Festival ne’e sai plataforma atu promove rekonsiliasaun, amizade no kooperasaun entre komunidade Timor-Leste no Indonézia, liuliu sira ne’ebé hela iha área fronteira rai no tasi. 

Jornalista : Cidalia Fátima

Editora    : Armandina Moniz