II Kopa Fronteira Boxe Amadora promove amizade no talentu joven Timor-Leste – Indonézia
BOBONARU, 22 Outubru 2026 (TATOLI) — II Kopa Fronteira Boxe Amadora, ne’ebé hala’o iha Munisípiu Bobonaru husi 17 to’o 21 Outubru 2026, hametin relasaun desportiva no amizade entre Timor-Leste no Indonézia liuhosi partisipasaun atleta husi nasaun rua.
Kompetisaun ne’e hala’o iha Estádiu Malibaka Yamato, Suku Ritabou, Postu Administrativu Maliana, ho tema “Boxe ba Halibur no Hametin Foin-sa’e ba Mudansa no Transformasaun”.
Eventu ne’e halibur asosiasaun boxe amadora husi munisípiu neen iha Timor-Leste no kontinjente atleta husi Kupang, Indonézia, atu promove talentu joven, hasa’e kualidade desportiva no hametin amizade entre komunidade sira iha área fronteira.
Vise Prezidente Konfederasaun Desportu Timor-Leste (CDTL-Sigla Portugés), Jose Caetano Guterres hateten kompetisaun nee hala’o nudar espasu ida hodi halibur foinsa’e sira ba mudansa no transformasaun.
Jose hato’o parabéns ba Federasaun Boxe Amadora Timor-Leste no Asosiasaun Boxe Amadora Bobonaru tanba sira konsege organiza kompetisaun ne’e ho susesu.
Nia akresenta partisipasaun atleta feto no mane husi Kupang halo kompetisaun ne’e sai eventu desportivu internasionál ida ne’ebé bele promove boxe iha área fronteira no iha Timor-Leste tomak.
“Ha’u fiar katak Bobonaru lori boxe ba koñesidu liután iha Timor-Leste, liuliu iha área fronteira. Kopa ida-ne’e la’ós kompetisaun lokál de’it, tanba atleta sira husi Kupang, Indonézia, mós partisipa,” José Caetano Guterres dehan iha serimónia enseramentu iha Estádiu Malibaka Yamato, Maliana, Kuarta ne’e.
Nia subliña katak kopa ne’e la’ós de’it fatin atu buka vitoria, maibé mós oportunidade atu kuda disiplina iha joven sira.
Jose destaka partisipasaun boxista lejendáriu husi Bobonaru, Victór Ramos, hamutuk ho atleta júnior sira, nu’udar ezemplu importante ba dezenvolvimentu modalidade boxe iha munisípiu ne’e.
“Ami nia parabéns ba atleta sira ne’ebé manán no ba sira ne’ebé lakon, atu nafatin hatudu prestasaun, mantein disiplina, hakmatek no kontinua ba oin, lori Timor-Leste ba mundu,” nia dehan.
Enkuantu, Sekretáriu Administrasaun no Finansa Autoridade Munisípiu Bobonaru, Domingos da Costa, hateten katak munisípiu ne’e presiza prepara an atu organiza kompetisaun boxe iha futuru, inklui dezenvolve infraestrutura no prepara ring boxe rasik.
Nia konsidera katak preparasaun ne’e importante atu fó fatin adekuadu ba jovem sira atu treina no partisipa iha kompetisaun, no mós atu Bobonaru bele simu atleta husi rai-li’ur iha eventu sira tuirmai.
Domingos espera katak, ho mudansa ne’ebé kontinua, Bobonaru bele hamosu fali boxista lejendáriu sira hanesan Tomas Americo no Victór Ramos, no dezenvolve jerasaun foun ba futuru.
“Ita hein katak ida-ne’e, ita sei halo. Tinan 10 ba oin, pelumenus ita hamosu fali boxista lendáriu sira hanesan Tomas Americo. Ita sei hamutuk ho boxista lendáriu Victór Ramos hodi lori Bobonaru ba oin,” nia dehan.
Komunidade Maliana, Domingos Pinto, mós hato’o ninia sentimentu alegria kona-ba realizasaun eventu ne’e, ne’ebé halibur atleta lokál no internasionál no anima komunidade durante loron lima.
Nia konsidera kompetisaun ne’e fó motivasaun boot ba jovem sira ne’ebé iha talentu boxe maibé seidauk hetan oportunidade atu dezenvolve sira-nia kapasidade.
II Kopa Fronteira Boxe Amadora hetan apoiu finanseiru husi MJDAK ho montante totál $30,000.
Husi montante ne’e, $10,100 aloka ba prému ba atleta manán-na’in 56, $2,000 ba servisu arbitrajem, kuaze $8,000 ba alojamentu no $6,000 ba konsumu.
Komisaun organizadora envolve voluntáriu na’in 60 hodi apoia preparasaun no implementasaun eventu ne’e.
Kompetisaun ne’e hala’o ho apoiu seguransa husi Polísia Nasionál Timor-Leste (PNTL), liuliu Komandu Munisipál Bobonaru no Bataliaun Ordem Públika Kompañia Delta Maliana, hamutuk ho F-FDTL. Servisu saúde munisipál Bobonaru mós fornese asisténsia médika durante eventu.
II Kopa Fronteira Boxe Amadora sai oportunidade atu dezenvolve talentu atleta sira, hametin amizade no kooperasaun desportiva entre Timor-Leste no Indonézia, no motiva joven Bobonaru atu partisipa ativu liután iha modalidade boxe amadora.
Jornalista: Sérgio da Cruz
Editór: Filomeno Martins
