Konstrusaun EBF Cusi iha suku Ban-Afi inauguradu, Presiza tan saida?
OEKUSI, 22 Outubru 2026 (TATOLI) –Autoridade Rejiaun Administrativa Espesiál Oekusi Ambeno (RAEOA), liuhusi Diresaun Servisu Rejionál Edukasaun, kuarta ne’e hala’o ona inaugurasaun ba saladeaula ba Eskola Bázika Filiál (EBF) 1.2 Cusi, ne’ebé lokaliza iha aldeia Hautefo suku Ban-Afi sub-rejiaun Nítibe.
Iha biban ne’e, Diretór Servisu Rejionál Edukasaun Oekusi, Vincêncio Cono, espera komunidade ho manorin sira, presiza koopera hodi tau matan, nune’e labele hetan estragu.
“Ha’u husu ba ita hotu atu kuidadu didi’ak eskola ne’e hodi labele hetan estragu. Labele riska arbiru parede eskola nian ho lapizeira no markadór sira. Papél inan-aman no mestre sira-nian importante tebes hodi eduka no guia labarik sira kona-bá valór kuidadu propredade públika no fasilidade ensinu nian,” nia hateten liuhusi diskursu inaugurasaun.
Agradese empreza konstrutora
Dirijente Edukasaun ne’e, sente haksolok no hato’o agradese ba empreza konstrutora tanba konsege finaliza servisu ne’e ho kualidade maske enfrenta dezafiu, obstakulu oioin iha tempu udan durante prosesu konstrusaun, hodi fasialita estudante no profesór sira bele hala’o prosesu ensinu no aprendizajen loron-loron nian ho di’ak, seguru, no dignu.
Iha fatin hanesan, Xefe Aldeia Hautefo, Madalena Sani, reprezenta komunidade, agradese ba Governu liuhusi Autoridade RAEOA, ne’ebé tulun ona EBF Cusi ba prosesu letiva nian, tanba durante tinan barak komunidade ho inan-aman sira halerik no preokupa ho kondisaun edifísiu eskola nian ne’ebé aat, maibé agora dezafiu ne’e rezolvedu ona ho konstrusaun foun ne’e.
“Ohin ita hotu haksolok tanba inagura no simu eskola ho modelu ne’ebé furak tebes. Eskola foun ne’e konstrui ho saladeaula haat no sala ida ba profesór sira,” Xefe Aldeia Hautefo dehan.
Diretór Kompaña Haumeni Aisaf Unipesoal LDA, Abilio Lafo, mos agradese ba konfiansa ne’ebé Autoridade RAEOA atribui, hodi konstrui projetu edukasaun ne’e iha loron 22 Janeiru 2026.
Diretór Kompañia ne’e husu mos ba komunidade no mestre sira atu kontinua servisu hamutuk no komunikasaun di’ak tanba kompaña sei iha prazu retensaun no responsabilidade durante fulan neen (6) ba edifísiu ne’e atu hadia de’it buat ne’ebé mak seida’uk kompletu.
Entretantu, konstrusaun edifísiu EBF 1,2 Cusi ne’e ho nia medida metru 27,50 x 9, komposta husi sala aprendizajen tolu (3) no sala ida (1) ba profesór sira.
Projetu infraestrutura ne’e finansia husi Orsamentu Autoridade RAEOA ho valór kontratu totál $97,319.14 no ho durasaun servisu konstrusaun ne’ebé la’o durante fulan neen (6).
Jornalista: Abílio Elo Nini
Editór: Rafael Ximenes de A. Belo
