MSSI – IADE lansa programa apoiu negósiu auto-sustentável ba ema ho defisiénsia
BOBONARU, 22 Outubru 2026 (TATOLI) — Ministériu Solidariedade Sosiál no Inkluzaun (MSSI), hamutuk ho Institutu Apoiu Dezenvolvimentu Emprezariál (IADE), lansa Programa Apoiu Negósiu Auto-Sustentável no Akonsellamentu Emprezariál hodi fó apoiu ba ema ho defisiénsia atu hahú negósiu rasik.
Lansamentu ba programa ne’e hala’o iha edifísiu IADE, Bobonaru, Kinta-ne’e, ho prezensa husi Ministra Solidariedade Sosiál no Inkluzaun, Verónica das Dores, reprezentante IADE, autoridade munisípiu, no parte relevante seluk.
Programa ne’e sei fó apoiu finanseiru entre $750 no $875 ba kada benefisiáriu, ho objetivu atu hametin kapasidade emprezariál, kria oportunidade ba autoempregu no aumenta rendimentu liuhusi dezenvolvimentu negósiu sustentável.
Programa ne’e sei implementa iha munisípiu lima, inklui Bobonaru, Manatutu, Manufahi, Vikeke no Kovalima, iha trimestre dahaat tinan 2026.
Iha Munisípiu Bobonaru, ema ho defisiénsia na’in lima mak sai benefisiáriu husi programa ne’e.
Ministra Solidariedade Sosiál no Inkluzaun, Verónica das Dores, hateten katak programa ne’e nia objetivu mak atu fó oportunidade ba ema ho defisiénsia sira dezenvolve kapasidade no harii negósiu tuir sira-nia kondisaun no abilidade.
Governante ne’e enfatiza katak ema ho defisiénsia presiza hetan oportunidade no apoiu atu bele dezenvolve sira-nia kapasidade no moris independente.
Nia esplika katak Governu la obriga benefisiáriu sira atu hahú negósiu ho eskala boot, maibé enkoraja sira atu hahú husi negósiu ki’ik no aprende jere rendimentu ne’ebé sira hetan.
“Osan ne’ebé benefisiáriu sira simu bele uza nu’udar kapitál inisiál atu hahú negósiu. Ho esforsu no jestaun ne’ebé di’ak, negósiu ki’ik bele dezenvolve neneik no aumenta rendimentu familiar,” Verónica enkoraja.
Nia afirma katak apoiu ne’e parte ida husi kompromisu governu nian atu labele husik ema ida iha kotuk, tanba ema ho defisiénsia mós iha kapasidade no abilidade atu kontribui ba dezenvolvimentu ekonómiku no sosiál.
Enkuantu, Diretór Ezekutivu IADE, Filomeno Marcelino Belo, hateten katak lansamentu programa ne’e marka inísiu implementasaun akordu ne’ebé instituisaun rua asina ona iha fulan hirak liubá, iha Aileu.
Nia esplika katak IADE sei fó asisténsia téknika ba benefisiáriu sira atu hasa’e koñesimentu, kapasidade no abilidade iha jestaun negósiu, nune’e sira bele kria autoempregu no aumenta rendimentu atu sustenta sira-nia moris.
Filomeno hatutan katak IADE sei mobiliza formadór sira atu vizita benefisiáriu iha sira-nia fatin, fó asisténsia téknika tuir sira-nia kondisaun reál, no akompaña prosesu formasaun.
Aleinde formasaun, nia dehan, IADE hamutuk ho MSSI sei fó mós akonsellamentu kona-ba negósiu no hala’o monitorizasaun konjunta atu avalia benefisiáriu sira-nia progresu antes, durante no depois formasaun.
“Rezultadu mak ita nia objetivu jerál, atu sira bele moris ho negósiu ne’ebé sustentável,” nia hateten.
Entretantu, Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, konsidera apoiu ba ema ho defisiénsia nu’udar pasu importante atu sira bele moris independente no hetan oportunidade hanesan membru komunidade seluk.
Nia husu ba família no komunidade atu la husik ema ho defisiénsia hela mesak, maibé fó apoiu no oportunidade ba sira atu buka moris tuir sira-nia kapasidade.
Jornalista: Sergio da Cruz
Editor: Filomeno Martins
