Xefe Estadu prezide reuniaun Konsellu Superiór Majistratura
DILI, 22 Outubru 2026 (TATOLI)-Prezidente Repúblika, José Ramos-Horta, kinta ne’e, prezide Reuniaun Konsellu Superiór Majistratura ne’ebé hala’o iha Palásiu Prezidénsial, Dili.
Iha reuniaun referidu partisipa direita mós husi Primeiru-Ministru, Xanana Gusmão, Prezidente Tribunál Rekursu, Afonso Carmona de Jesus, Ministru Justisa, Sergio Hornay, Koordenadora Reforma Justisa, Lucia Lobato, inklui ekipa estrutura hudi Tribunál Rekursu.
Observasaun TATOLI iha terrenu, enkontru ne’e hala’o durante oras rua liu, hahú iha tuku 10:00 ramata iha tuku 12:15, antes reuniaun Konsellu Superiór Majistratura Primeiru-Ministru Xanana Gusmão hala’o uluk enkontru semanál ho Prezidente Repúblika hodi relata serbisu Governu nian iha dadersaan tulu 09:00.
Hafoin reuniaun semanál entre Xefe Estadu no Xefe Governu, Primeiru-Ministru Xanana Gusmão sai tiha husi Palásiu Prezidénsial minutu balun hafoin iha tuku 10:00 filafali ba Palásiu Prezidénsial kontinua kedas reuniaun Konsellu Superiór Majistratura durante oras rua resin.
Hafoin enkontru ekipa tuun mai jornalista sira preparadu ona atu entrevista maibé hothotu lakohi entrevista Primeiru-Ministru, Xanana Gusmão tuun ba liu kedas sa’e karreta, nune’e Ministru Justisa, Sérgio Hornai mós tuir kedas Xefe Governu ba sa’e karreta sai husi odamatan boot Palásiu Prezidente nian.
No coment
Nune’e jornalista sira tenta hapara Prezidente Tribunál Rekursu, Afonso Carmona, tanba nia sai liuhusi odamatan kotuk la hamutuk ho Xefe Governu no Ministru Justisa, maibé nia parte lakohi fó komentáriu.
“Ha’u liuhusi kotuk signifika no coment. Ha’u lakohi fó komentáriu”, Afonso Carmona hatete ba jornalista sira iha Palásiu Prezidénsial Bairru-Pité, Dili.
Ho resposta ida-ne’e, jornalista sira tuir to’o mai parrajen karreta nian mós nia parte lakohi fó komentáriu, nune’e husi reuniaun Konsellu Superiór Majistratura jornalista sira labele hatene rezultadu husi reuniaun.
Jornalista: Arminda Fonseca
Editór: Rafael Ximenes de A. Belo
