Ai-moruk Anestesia disponivel iha Hospitál Nasionál Guido Valadares
DILI, 23 Outubru 2026 (TATOLI)–Diretór Klinika iha HNGV, Eligio Agostinho de Araújo Soares klarifika ai-moruk anestesia disponivel iha Hospitál Nasionál Guido Valadares.
“Atu resposde de’it ba informasaun ne’ebé mak espalla iha mídia sosiál katak falta ai-moruk anestesia iha HNGV adia ba operasaun ba da-rua no informasaun ne’ebé mak hato’o ne’e la loós. Ita-nia operasaun até adata la’o normál hela, ita-nia operasaun iha tipu rua hanesan operasaun eletiva no operasaun emerjénsia la’o hela. Até adata ita-nia ai-moruk mós iha,” Eligio Agostinho de Araújo Soares hateten ba jornalista sira iha HNGV, Bidau, ohin.
Nia hateten, atu responde ba iha atende nesesidade ospital liuliu departamentu bloku operatóriu nian hodi atende kazu sira husi maternidade pasiente sira-ne’ebé mak ho Cesariana ortopedia no sirurjiaun jerál, atu responde ba informasaun ne’e mak katak operasaun la’o normál hela.
“Kona ba ai-moruk, agora daudaun ita-nia ai-moruk desponivel hela. Ami-nia Xefe Departamentu mak ne’e hela, ami halo kompra iha semana ida-nia laran no operasaun la’o normál até adata. Kazu ne’ebé ita hetan, ami seidauk identifika di’ak, depois ita husu fali depois mak ita bele hato’o fali informasaun ne’e. Normalmente ita halo ita-nia pedidu regulár ba fornesedór sentrál INFPM,” nia informa.
Nia esplika, HNGV mós iha osan kompra emerjénsia iha situasaun balun INFPM labele fornese tanba buat hotu liuhusi prosesu, entaun ospitál mós desponivel buka solusaun atu bele rezolve situasaun sira ne’ebé mak enfrenta.
Jornalista : Felicidade Ximenes
Editór : Cancio Ximenes
