Aplikante sira husu ekipa juri klarifika prosesu rekrutamentu ba profisionál saúde

DILI, 23 Outubru 2026 (TATOLI)–Aplikante sira-ne’ebé la hetan aprovasaun iha prosesu rekrutamentu vaga iha Hospitál Nasionál Guido Valadares (HNGV) kontesta rezultadu selesaun dokumentu no reklamasaun.

Tanba, aplikante sira dehan, sira hetan irregularidade ne’ebé mosu iha prosesu rekrutamentu ne’e, tanba ne’e sira husu ba ekipa júri atu fó klarifikasaun públika kona-ba prosesu rekrutamentu ne’e.

Portavóz aplikante sira-ne’ebé la hetan aprovasaun, Almeida Soares, hato’o deklarasaun ne’e, iha Jardín 5 de Maiu, Dili, no husu mós ba entidade relevante sira atu halo monitorizasaun ba prosesu rekrutamentu ne’e.

“HNGV loke vaga rekrutamentu ne’e no publika anúnsiu iha loron 07 Setembru 2026, ho nesesidade rekursu umanu hamutuk 478 atu servisu iha Bloku Pediatria HNGV. Durante loron 10, hahú husi 07 to’o 18 Setembru 2026, kandidatu sira hato’o sira-nia dokumentu iha Hospitál António de Carvalho, Lahane, tuir rekezitu ne’ebé anúnsiu rekrutamentu determina. Total kandidatu ne’ebé submete dokumentu hamutuk 8.084,” Almeida Soares hateten ba jornalista sira liuhusi konferensia imprensa iha Jardin 5 de Maiu, Kolmera, ohin.

Nia esplika, iha loron 11 Outubru 2026, HNGV publika rezultadu selesaun dokumentu, ho kandidatu na’in-4.537 hetan aprovasaun, enkuantu na’in-3.437 la hetan aprovasaun.

Hafoin HNGV fó oportunidade ba kandidatu sira-ne’ebé la hetan aprovasaun atu submete reklamasaun ka rekursu no totál kandidatu na’in-1.645 mak aprezenta reklamasaun maibé iha loron 20 Outubru 2026, rezultadu reklamasaun hatudu katak kandidatu na’in-61 de’it mak hetan aprovasaun, enkuantu na’in-1.584 seluk nafatin la hetan aprovasaun.

“Nune’e, ami haree husi rezultadu reklamasaun/rekursu ida-ne’e halo ami hotu sente insatisfás tebes, tanba mosu Irregularidade no KKN neʼebé boot tebes iha rekrutamentu ida-ne’e,” nia dehan.

Nia afirma katak, kandidatu sira identifika kazu balun ne’ebé, tuir sira-nia observasaun, presiza hetan klarifikasaun husi ekipa júri.

Kazu dahuluk envolve kandidata husi área Tékniku Nutrisaun, Nelcia da Silva Da Costa, ne’ebé hela iha Bekora, ho númeru kartaun eleitorál 000838624, kandidata ne’e nia naran la mosu iha lista kandidatu aprovadu ka la aprovadu iha rezultadu selesaun dokumentu maibé ikusmai nia naran mosu iha lista reklamasaun ka rekursu ne’ebé hetan aprovasaun.

Kazu daruak, envolve kandidatu husi área Tékniku Medical Record, Steven Nandino M. da Costa, ne’ebé hela iha Bekora, Klak Fuik, ho númeru kartaun eleitorál 000990429, kandidatu ne’e nia naran mosu iha lista la aprovadu, iha númeru 87, no la hetan aprovasaun tanba iha dokumentu balun ne’ebé tuir rezultadu selesaun la kumpre rekezitu.

“Dokumentu ne’ebé ha’u temi inklui kartaun profisionál ne’ebé la aprezenta, sertifikadu bom komportamentu ne’ebé la asina, karta aplikasaun ne’ebé la asina no Curriculum Vitae (CV) ne’ebé la asina,” nia esplika.

Nia dehan, maske kandidatu ne’e iha problema dokumentu sira-ne’e, nia hetan aprovasaun depois halo reklamasaun ka rekursu. Tanba ne’e, nia husu atu esplika kritériu ne’ebé júri uza hodi foti desizaun kona-ba reklamasaun sira.

Kazu seluk envolve Mario Pereira, kandidatu husi área Tékniku Nutrisaun. Kandidatu ne’e aprezenta dokumentu hotu iha Hospitál António de Carvalho, Lahane, no simu resivu husi funsionáriu atendimentu maibé nia naran la mosu iha lista aprovadu ka lista la aprovadu.

“Kandidatu balun ne’ebé la hetan aprovasaun iha rezultadu dahuluk, depois de halo reklamasaun ka rekursu, hetan aprovasaun maske sira iha problema dokumentu hanesan ho kandidatu seluk ne’ebé nafatin la hetan aprovasaun. Nu’uné husi pontu sira ami mensiona iha leten ne’e, ami nota katak iha rekrutamentu rejime Kareira Espesial ida-ne’e mosu irregularidade no KKN ne’ebé boot tebes iha Hospitál Nasionál Guido Valadares. Tanba ne’e, ami husu ba Prezidente da Juri doutor Vidal de Jesus Lopes ho ekipa tomak atu deklara ba publiku kona-ba iregularidade ida-ne’e,” nia dehan.

Tanba, kazu sira ne’e, kandidatu sira husu ba entidade relevante inklui Provedoria dos Direitu Umanu no Justisa (PDHJ), sosiedade sivíl, Parlamentu Nasionál no Primeiru-Ministru, atu fó atensaun ba alegasaun irregularidade iha prosesu rekrutamentu iha instituisaun Estadu.

Nia hateten, ezijénsia la’ós atu obriga ekipa júri atu aprova kandidatu hotu maibé atu garante transparénsia, justisa no klaridade iha avaliasaun dokumentu no prosesu reklamasaun.

“Ha’u klarifika katak se laiha klarifikasaun, kandidatu sira sei organiza malu atu impede teste hakerek ne’ebé sei hala’o iha Komisaun Funsaun Públika iha loron 26 Outubru 2026. Kandidatu sira hein katak ekipa júri HNGV sei fó esplikasaun kona-ba kazu sira-ne’ebé sira hato’o, atu evita dúvida no asegura konfiansa públika ba prosesu rekrutamentu,” nia hateten.

Jornalista : Felicidade Ximenes

Editór        : Cancio Ximenes