Ezekusaun OJE 2026 husi SEKOOP atinje 78,89%
DILI, 23 Outubru 2026 (TATOLI) – Sekretaria Estadu Kooperativa (SEKOOP), ezekuta Orsamentu Jerál Estadu (OJE) 2026 atinje 78,89% husi orijen $3,585,676.00.
Verba inisiál ne’e aloka ba saláriu no vensimentu $1.555.767, bens serbisu $2.055.519. Hodi finansia programa boot rua, dezenvolvimentu rurál no urbanu ho nia sub-programa promove no estabelese kooperativa no programa funsionamentu no dezenvolvimentu instituisionál.
Liuhusi audiénsia públika ho Komisaun C Trata Asuntu Finansa Públika, iha Parlamentu Nasionál, Sekretáriu Estadu Kooperativa, Arsénio Perreira, aprezenta katak, rezultadu ezekusaun husi kategória orsamentál iha bens serbisu mak fasilita ba movimentu kooperativa primária hamutuk 277 ho membru efetivu 41.933, kooperativa sekundária federasaun 15, konfederasaun nasionál koperativa ida.
“Kooperativa sira-ne’e iha munisípiu 13. Ho kapitál akumuladu $21.148.93,75. Iha ramu 16 maiória uniaun kréditu [no] multisetoriál hala’o atividade oioin, liuliu atividade ekonómiku,” nia hatete.
Governante ne’e, hatete iha proposta OJE 2027 SEKOOP prevee millaun $ 3.97, kompara ho tinan fiskál ne’e hetan redusaun.
“Redusaun tanba, iha 2026 orsamentu ne’ebé aloka ba konferénsia no espozisaun rejionál ba ASEAN nian ne’ebé ezekuta ona, nune’e tinan tinan oin la prevee ba ida-ne’e,” nia dehan.
Tuir dokumentu livru orsamentál, ne’ebé Tatoli asesa ba tinan oin SEKOOP prevee $3.000.097 aloka ba saláriu no vensimentu $1.555.757, bens no serbisu $1.444.340, finansia programa dezenvolvimentu rurál no rubanu ho sub-programa rua, promove no estabelese kooperativa.
Nune’e mós promove dezenvolvimentu produtu kooperativa. Programa funsionamentu no dezenvolvimentu instituisionál ho sub-programa rua.
Jornalista: Nelson de Sousa
Editór: Evaristo Soares Martins
