HNGV ezekuta OJE 2026 atinje ona 71%
DILI, 23 Outubru 2026 (TATOLI)—Diretora Administrasaun Finansas, Lojístika no Aprovizionamentu iha Hospitál Nasionál Guido Valadares (HNGV), Silvia Izina A. Belo Ximenes, informa HNGV ezekuta OJE 2026 atinje ona 71% husi orsamentu orijinák ne’ebé Governu prevee ba MS hamutuk $20,860,647,00.
Nia esplika, husi orsamentu ne’e fahe ba kategoria haat hanesan saláriu vensimentu hamutuk $12.136.963,00, bens servisu $4.110.284,00, kapital menór $4.350.000,00 no kapitál dezenvolvimentu $263,400.00.
“Total ezekuzaun husi Janeiru to’o Setembru ne’e, ita atinje ona 71% no ida-ne’e ne’e inklui atuál obligasaun no komitmentu. Atuál ne’e atinje ona 46%, komitmentu 18% no obligasaun 7%,” Silvia Izina hateten ba jornalista sira iha nia kna’ar fatin HNGV, ohin.
Silvina dehan, Orsamentu Jerál Esadu tinan 2027, antes aprova orsamentu, dahuluk HNGV tetu orsamentu estimasaun futurá HNGV hetan millaun $16-resin, depois HNGV hato’o proposta adisionál HNGV hetan tan millaun $6-resin, entaun HNGV nia orsamentu ba tinan 2027 purvolta $22.991.045,00.
“Orsamentu ida-ne’e jerál maibé sei fahe ba kategoria haat hanesan salariu vensimentu hamutuk $14.921.551,00, bens servisu hamutuk $6.551.844,00, kapitál menór hamutuk $975.000,00 no kapitál dezenvolvimenntu hamutuk $541.650,00.
“Razaun aumenta orsamentu iha saláriu vensimentu ba tinan 2027 ne’e tanba ita agora daudaun iha enkuadramentu ba rejime karreira espesiál sira hanesan médiku, enfermeiru, parteira tékniku aliadu, sira-nia saláriu tenke aumenta, entaun ida-ne’e mak orsamentu ba tinan oin mós sa’e,” nia dehan.
Jornalista : Felicidade Ximenes
Editór : Cancio Ximenes
