KI-Banku Mundiál kapasita jornalista sira iha área ekonomia liuhusi forum editoriál
DILI, 23 Outubru 2026 (TATOLI)—Konsellu Imlrensa Timor-Leste (KITL) servisu hamutuk ho Banku Mundiál (World Bank Group) atu kapasita jornalista sira iha área ekonomia liuhusi forum editorial.
Prezidente Interina Konsellu Imprensa (KI), Suzana Cardoso, hateten atividade ohin ne’e hanesan faze dahuluk kooperasaun entre KI no Banku Mundiál hodi fahe koñesimentu kona-ba asuntu ekonomia nian.
“Ami haree katak asuntu ne’e importante, ne’ebé bainhira Banku Mundiál hakarak halo kooperasaun ami sente previléjiu tebes no aberta oportunidade ida-ne’e,” Suzana Cardoso hateten ba jornalista sira iha salaun KI Kintál Boot, ohin.
Tanba, nia dehan, dalabarak mak tau atensaun de’it ba kestaun polítika, maibé lahatene katak asuntu ekonomia mós liga direta ba sosiedade sira no bein-estar nasaun.
Tuir nia, KI iha planu atu integra kategória ekonomia iha prémiu anuál KI nian, hodi hetan atensaun másimu mós husi mídia sira liuliu mîdia estatal ne’ebé ninia finansiamentu forte.
“Imi tenke aproveita didi’ak diskusaun ne’e hodi aumenta koñesimentu ba imi-nia reportajen,” nia dehan.
Reprezentante Banku Mundiál iha Timor-Leste, David Freedman, hateten sira rekoñese servisu jornalista sira-nian tanba importante tebes ba prosesu dezenvolvimentu nasaun nian.
“Tanba ne’e jornalista iha papel atu hala’o nia servisu hodi hato’o imformasaun bazeia ba dadus, faktus no peskiza,” nia hateten.
Banku Mundiál ho KI hamosu ideia ida ba sesaun diskusaun hodi hasa’e koñesimentu kobertura ba resportajen ida iha asuntu ekonomia liuliu relatóriu ne’ebé sira públika kona-ba pobreza (poverty).
“Tanba la’ós iha liberdade mak asegura ita-nia demokrásia maibé ita presiza oportunidade ne’ebé iha atu halo kobertura no tulun komunidade hotu komprende aleinde akompaña desizaun polítika sira husi Governu,” nia dehan.
Ho nune’e, nia solisita ba jornalista sira atu atensaun ba diakusaun ne’e hodi implementa esperiénsia ne’ebé iha ba servisu jornalizmu nian.
Nune’e mós, tuir Senior Economist, Bambang Suharnoko Sjahrir, dehan métodu atu sukat pobreza ne’e la’ós haree de’it ba aspetu finansiál (osan), maibé haree ba aspetu oioin asesibilidade, kapabilidade envolve-an iha komunidade nia leet (bersosialisasi).
“Signifika la’ós dehan ita menus finansiál maibé finansiál ne’ebé iha bele uza ba buat barak ka lae hanesan konsumu aihán nutriente, nesesidade família garantidu ka lae iha saúde, edukasaun no seluk tan,” nia hateten.
Nune’e, nia dehan, razaun atu sukat pobreza ne’e tanba bele hetan atensaun, bele halo intervensaun ba stakeholder, monitorizasaun no evaluasaun katak iha mudansa ka lae no evaluasaun mós ba instituisaun kompetente sira.
“Liuliu kona-ba konsumu nian sei haree mós ninia income, no sukat ho tipu tolu mak hahan produsaun rasik iha kintál, hetan hahán husi ema seluk no hahán ne’ebé sosa iha supermerkadu. Entaun, husi ne’e sei sukat proteina ne’ebé ita konsumu liuhusi padraun internasionál WHO, hafoin ne’e bele identifika presu no komponente hahán no la’ós hahán,” nia esplika.
Jornalista : Alexandra da Costa
Editór : Cancio Ximenes
