PM Xanana ofisialmente Loke Festivál Fronteira 2026, Hametin Dame no Rekonsiliasaun TL – Indonézia

LAUTÉM, 23 Outubru 2026 (TATOLI) – Primeiru-Ministru (PM), Kay Rala Xanana Gusmão, loke ofisialmente Festivál Fronteira 2026, iha Suku Com, Postu Administrativu Lautém, Munisípiu Lautém, Sexta ne’e ho mensajen atu hametin dame, diálogu no rekonsiliasaun entre povu Timor-Leste no Indonézia.

Festivál ne’ebé realiza ba dala haat ne’e hala’o ho tema “Interkámbiu Kulturál Hametin Rekonsiliasaun” no subtema “Ha’u-nia Rai, Ha’u-nia Tasi, Ha’u-nia Kultura”, ho partisipasaun delegasaun husi Timor-Leste no Indonézia, liuliu husi Nusa Tenggara Timur no Maluku Barat Daya.

Iha nia diskursu, Xanana Gusmão afirma katak, maske Festivál Fronteira nu’udar atividade ki’ik, maibé nia objetivu boot tebes, tanba sai oportunidade atu hatudu ba mundu katak dame no kooperasaun bele hahú husi relasaun di’ak entre komunidade sira.

“Maske Festivál Fronteira ki’ik de’it, maibé nia objetivu boot tebes. Husi atividade ki’ik hanesan ne’e, ita bele hatudu ba mundu katak ema tenke moris hamutuk, komprende malu, koordena malu no halo diálogu,” dehan Xanana Gusmão.

Xefe Governu ne’e konsidera katak relasaun entre Timor-Leste no Indonézia la’ós de’it relasaun diplomátika entre nasaun viziñu, maibé mós ligasaun istórika, kulturál no família ne’ebé iha ona desde tempu bei’ala sira.

Nia hato’o apresiasaun ba delegasaun Indonézia ne’ebé mai partisipa iha festivál ne’e, tanba konsidera sira-nia prezensa nu’udar manifestasaun fraternidade entre povu nasaun rua.

“Ha’u apresia ho laran tomak imi-nia preparasaun atu mai iha ne’e, la’ós nu’udar turista, maibé nu’udar maun-alin no feton-nan,” nia afirma.

Iha oportunidade hanesan, Prezidente Autoridade Munisipál Lautém, Mélio de Jesus, konsidera katak festivál ne’e sai oportunidade importante atu haforsa amizade no kooperasaun entre komunidade sira iha nasaun rua, liuliu sira ne’ebé iha ligasaun istórika no kulturál.

“Festivál ida ne’e la’ós de’it eventu atu aprezenta dansa, múzika, arte no produtu lokál, maibé mós plataforma atu promove diálogu, troka esperiénsia, valoriza istória no diversidade kulturál, no hametin amizade, solidariedade no kooperasaun entre komunidade sira iha nasaun rua,” Mélio de Jesus afirma.

Enkuantu, Diretór Ezekutivu Sentru Nasionál Chega! (CNC), Hugo Maria Fernandes, subliña katak Festivál Fronteira organiza atu haforsa identidade, memória no relasaun kulturál entre komunidade sira iha área fronteira.

Nia esplika katak festivál ne’e la’ós atu fó atensaun ba delimitasaun fronteira rai ka tasi, maibé ba relasaun kulturál no moris loron-loron komunidade sira.

Festivál Fronteira realiza ba dala dahuluk iha Maliana, Munisípiu Bobonaro, iha 2023, edisaun daruak iha Oé-Cusse iha 2024, no edisaun datoluk iha Covalima iha 2025, antes edisaun ba dala haat realiza iha Lautém iha tinan 2026. 

Jornalista : Cidalia Fátima

Editora   : Armandina Moniz