Presu materiál konstrusaun mantein, Simentu sa’e ba $5
DILI, 22 Outubru 2026 (TATOLI) – Iha estabelesimentu komersiál sira iha Dili, presu materiál ba konstrusaun no seluk nafatin fiksa ka la iha mudansa enkuantu simentu mak sa’e $ 1,50 kompara ho presu anteriór $ 3,50. Presu atuál $5.
“Ita-nia sasán materiál konstrusaun sira seluk hanesan besi, kalén (zinku), ai no seluktan folin normál ka laiha mudansa, maibé iha mudansa mak Simentu ho folin $5”, Funsionáriu Loja Konstrusaun Materiál Easy, Hudi-Laran, Celestino Soares hateten eskluzivamente, iha marjen observasaun TATOLI nian ba presu sira, ohin.
Empregadu Loja Konstrusaun ne’e esplika, razaun sira hasa’e folin tanba limitasaun produsaun simenti iha fábrika sira iha Indonézia entaun afeta kuantidade importasaun mai Timot-Leste.
“Ita hasa’e folin tanba ita ba sosa iha armazen, sira hasa’e folin entaun ita sosa mai fa’an fali mós hasa’e. Antes folin simentu seidauk sa’e ami fa’an folin tun liu $3,50 agora ba sa’e ba $5”, nia kompara.
Iha sorin seluk, funsionáriu Loja Yemey Cha, Fernanda Martins subliña sira-nia loja mós folin ba materiál konstrusaun sira seluk mantein simentu de’it mak sa’e ba $5.
“Ita ba sosa iha armazen simentu saka ida folin $4,75 entaun ami mai fa’an fali $5, ami hasa’e folin mós uituan de’it”, nia dehan.
Materiál konstrusaun ne’ebé folin mantein mak hanesan besi 12ml $6, kalén 0,42 metru ida folin $3,75, triplet folin normál 122cmX244cm $11.
Triste ho folin
Enkuantu, Konsumidór Pedro da Costa, hateten katak hanesan povu baibain sente triste loos ho folin simentu ne’ebé sa’e.
“Ami hanesan povu baibain haree folin to’o $5 ne’e ami sente triste loos. Uluk folin sei $3,50 no $4 ne’e, ita sosa sei bele maibé agora sa’e ba $5 ita atu sosa barak mós hanoin dala-rua lai. Ha’u hanoin ho situasaun sira hanesan ne’e Governu hanoin nune’e ba futuru ita mós prodús rasik ita-nia, nune’e labele depende ba nasaun seluk lae, ita araska”, dehan.
Jornalista: Arminda Fonseca
Editor: Rafael Ximenes de A. Belo
