Rai-nakdoko iha Xina ho magnitude 7.0 hamate ema na’in-16

DILI, 23 Outubru 2026 (TATOLI) – Konsellu Estadu nia sede tulun rai-nakdoko no Ministériu Jestaun Emerjénsia hasa’e ona nível resposta emerjénsia rai-nakdoko nasionál hosi Nível IV ba Nível III, hafoin rai-nakdoko ho magnitude 7.0 iha Rejiaun Autónoma Xizang, iha sudoeste Xina, anunsia iha loron-sesta ne’e.

Ekipa traballu ida mós haruka ona ba área ne’ebé hetan rai-nakdoko hodi fó orientasaun no asisténsia ba esforsu salvamentu no tulun nian. Rai-nakdoko ne’e akontese iha Kondadu Baqen, iha sidade Nagqu, iha tuku 10:33 kalan. iha loron-kinta, halo ema na’in-16 mate no na’in-54 kanek.

Hafoin nakdoko, komandante adjuntu ida hosi sede tulun ba rai-nakdoko Konsellu Estadu nian no ofisiál ministeriál relevante sira kontinua koordena no orienta operasaun sira resposta emerjénsia nian.

Ministériu ne’e mós orienta departamentu jestaun emerjénsia Xizang nian atu arranja kolokasaun drone sira modelu Wing Loong nian ba área ne’ebé hetan rai-nakdoko.

Servisu nasionál bombeiru no salvamentu Xina nian mobiliza respondente hamutuk 350 no veíkulu 83 ba operasaun salvamentu sira. Iha tuku 6:30 dadeer iha loron-sesta, respondente 120 no veíkulu 27 to’o ona iha área ne’ebé afetadu hosi rai-nakdoko, enkuantu respondente adisionál 230 no veíkulu 56 hosi servisu bombeiru no salvamentu Xizang nian iha dalan hanesan reforsu, tanba tama ona iha jurizdisaun Nagqu nian.

Iha tuku 4:30 dadeer iha loron-sesta, autoridade sira mobiliza ona fornesimentu tulun nian hosi nível sentrál, rejionál, munisípiu no distritál, hodi haruka sira iha laloran tuituir malu ba área ne’ebé afetadu hosi rai-nakdoko.

Fornesimentu sira inklui unidade uma prefabrikadu 1,000, tenda 3,239, berço dobrável 2,821, no manta 4,280, entre sasán esensiál sira seluk.

Fonte: Xinhua