CATM distribui kadeira-roda no ai-tonka ba EhD 40 resin iha Bobonaru
BOBONARU, 24 Outubru 2026 (TATOLI) — Husi fulan Maiu to’o Outubru 2026, Sentru Atendimentu Temporária Maliana (CATM-Sigla Portugés) apoia ona kadeira-roda no ai-tonka ba ema ho defisiénsia (EhD) na’in 40 resin iha Munisípiu Bobonaru.
Ministra Solidariedade Sosiál no Inkluzaun, Verónica das Dores, hateten katak apoiu ne’e nu’udar esforsu Governu nian atu fasilita mobilidade no garante katak ema ho defisiénsia bele asesu ba ambiente li’ur no kontinua partisipa iha atividade loroloron.
Nia esplika katak, além kadeira-roda no ai-tonka, CATM mós prepara ekipamentu seluk, inklui Prótese de mão (liman falsu) no Prótese de perna (ain falsu) ba EhD sira.
Maibé, Verónica dehan ekipamentu hirak ne’e presiza sukat tuir medida benefisiáriu ida-idak nian, molok halo distribuisaun.
“Karik iha ema ho defisiénsia ne’ebé hela de’it iha uma, ita presiza fahe informasaun no buka dalan atu ajuda sira. Se nia labele sai, la’ós kadeira-roda de’it, maibé ita bele prepara kama ne’ebé hanesan kareta ida atu dudu nia ba li’ur, atu nia bele sente loro-matan no haree rai hodi kontinua nia moris. Ida ne’e mak ita halo tanba lakohi husik ema ida iha kotuk,” ministra ne’e dehan iha serimónia lansamentu programa auto-sustentável ba ema ho defisiénsia, iha salaun IADE, Munisípiu Bobonaru, Kuarta ne’e (22/10).
Nia hato’o mós katak ema ho defisiénsia ne’ebé presiza apoiu tenke hetan atensaun adekuada, atu bele asesu ba ekipamentu ne’ebé apropriadu no responde ba sira-nia nesesidade.
“Ema ho defisiénsia mós iha direitu hanesan ho ita, sira presiza sente buat hotu-hotu hanesan ho ita,” nia dehan.
Enkuantu, Koordenadór CATM, Ricardo Maia, konfirma katak distribuisaun ekipamentu hirak ne’e bazeia ba rezultadu avaliasaun iha terrenu, ne’ebé ekipa CATM hala’o tuir pedidu husi família no ema ho defisiénsia.
“Ita mai dahuluk iha fulan Maiu, no iha semana ida-ne’e ita distribui kedas kadeira-roda no ai-tonka iha Maliana, depois Bobonaru, Loloto’e no Kailaku. Tuir planu, ita sei kontinua iha Balibo,” Ricardo Maia dehan.
Estabelesimentu CATM iha Maliana ne’e parte ida husi esforsu Governu atu lori servisu besik liután ba ema ho defisiénsia, hodi nune’e sira la presiza dezloka ba Dili atu hetan atendimentu no apoiu hanesan kadeira-roda no ai-tonka.
Inisiativa ne’e nia objetivu prinsipál mak atu fasilita asesu ba servisu ne’ebé di’ak ba ema ho defisiénsia (EhD), hamenus gastu no risku durante viajen, no garante katak sira hetan atendimentu sedu no apropriadu, tuir sira-nia kondisaun no nesesidade.
Jornalista: Sergio da Cruz
Editór: Filomeno Martins
