Governu lansa Eskultura Lenuk Tasi iha Lautein hodi promove Ekonomia Azúl no prezervasaun ambiente

LAUTEIN, 24 Outubru 2026 (TATOLI) – Sekretáriu Estadu Ensinu Sekundáriu Jerál no Tékniku-Vokasionál, Domingos Lopes Lemos, Sekretariu Estadu Arte no Kultura (SEAK) hamutuk ho Prezidente Autoridade Munisípiu (PAM) Lautein, Melio de Jesus, lansa Eskultura Lenuk Tasi, nu’udar parte husi kampaña sensibilizasaun Ekonomia Azúl.

Serimónia ne’e lidera husi Gabinete Fronteira Terrestre no Marítima (GFTM) iha koordenasaun ho Ministériu Edukasaun no Autoridade Munisípiu Lautein, no partisipa husi estudante kuaze 500 husi Ensinu Báziku, Sekundáriu no Tékniku-Vokasionál.

Sekretáriu Estadu Domingos Lopes Lemos hatete inisiativa ne’e  hola parte husi série nasionál instalasaun arte públika animál tasi nian, ne’ebé ho objetivu atu promove resiklajen no ábitu soe plástiku ho responsabilidade.

“Se ikan azúl hela iha Dili, ohin Lenin tasi hiit an iha Lautein. Ne’e hatudu ho klaru katak Ekonomia Azúl la’ós pertense ba Dili de’it, maibé ba Timor-Leste tomak, hahú kedas husi Lautein”, Domingos Lemos dehan.

Nia esplika, aleinde nia valór artístiku, lenuk tasi sei serve hanesan pontu foun ba halibur botir plástiku mamuk sira.

“Kada botir plástiku ne’ebé ita halibur, kontribui ba prezervasaun Timor-Leste nia tasi-ibun ne’ebé moos no biodiversidade tasi nian ne’ebé riku”, nia subliña.

Iha fatin hanesan, PAM Lautein, Melio de Jesus husu ba estudante sira atu labele soe lixu plástiku arbiru.

“Soe lixu iha fatin ne’ebé prepara ona, tau iha lenuk tasi nia kabun laran. Atu labele estraga ita-nia biodiversidade tasi nian”, Melio de Jesus hateten.

Eskultura ne’e kria husi artezaun timoroan ida no kontinua husi lansamentu ikan azúl iha Dili iha tinan 2024 husi Primeiru-Ministru, Xanana Gusmão, hodi hametin kompromisu Governu nian atu garante dezenvolvimentu Ekonomia Azúl la’o hamutuk ho protesaun patrimóniu naturál.

Jornalista: Hortêncio Sanchez

Editora: Maria Auxiliadora