Aplikante 4.706 ba vaga rekrutamentu HNGV tuir teste eskrita faze daruak iha semana ne’e
DILI, 26 Outubru 2026 (TATOLI)—Diretór Servisu Apoiu Diagnóstiku no Terapéutiku, Vidal de Jesus Lopes, hateten aplikante 4.706 ne’ebé aplika ba vaga rekrutamentu ba karreira espesiál husi Hospitál Nasionál Guido Valadares, daudaun ne’e iha direitu atu tuir teste eskrita ba faze daruak nian iha semana ne’e hahú husi 26 to’o 05 Novembru 2026.
Vidal de Jesus Lopes hateten, kandidatu ba rejime espesiál totál hamutuk 8.084 no husi númeru ne’e sira-ne’ebé admitidu hamutuk 4.706 mak iha direitu ba tuir teste eskrita ba segunda faze nian.
“Agora daudaun ita fó teste eskrita ba segunda faze no hahú ona iha loron ohin,” Vidal de Jesus hateten ba jornalista sira, iha Komisaun Funsaun Públiku, Matadoru, ohin.
Nia informa, kona-ba konferénsia empresa ne’ebé mak aplikante balun halo ne’e sira-nia direitu, tanba Timor-Leste moris ho Demokrasia ne’e normál, liberdade espresaun tanba iha lei no regra mós hateten katak iha aplikante sira hatama dokumentu iha loron lima atu halo reklamasaun.
“Sira halo reklamasaun ne’e hamutuk 1.744 no husi númeru ne’e depois ekipa juri haree no verifika didi’ak katak sira-nia dokumentu balun naran mosu iha fatin ida no balun naran laiha liu. Entaun, sira-ne’e reklama haree fali sistema katak ema sira-ne’e naran laiha, entaun reklamasaun ne’e lolos ita refere ba ida-ne’e ou balun sira-nia diploma orijinál ne’e kopi halo berwarna hanesan tiha ho orijinál. Entaun, ita tenke haree didi’ak maibé balun naran mosu iha fatin rua. Entaun, ha ne’eba, ekipa juri haree no iha 60-resin mak avansa ba faze segundu eskrita nian,” nia dehan.
Nia esplika, tuir lei totál valór 60 ba leten mak foin pasa maibé banhira iha valor 59 mai kraik sei la pasa, tanba ne’e sira ezame hotu mai iha pisu kraik sira haree kedas sira-nia valor sé mak pasa ka la pasa.
“Entaun banhira teste ida-ne’e ramata mak ekipa juri sei tur hamutuk hodi avansa ba terseiru faze ba entervista nian,” nia esplika.
Iha fatin hanesan, Aplikante Aguida Pereira de Araújo afirma, nia sente kontente tuir teste ne’e maske iha matéria balun ne’ebé mak defisil no ikus nia bele liu iha teste ne’e ho valór 62.
“Ha’u sente kontente ho rezultadu ne’ebé iha tanba teste eskrita ne’ebé ha’u hetan, maske durante preparasaun ha’u estuda matéria jerál no la foka barak ba matéria espesífika iha área informasaun, maibé matéria ne’ebé sai iha teste eskrita ne’e barak liu kona-ba matéria espesífika liuliu kona-ba atendimentu iha ospitál no kuidadu ba pasiente, inklui pediatria,” Aguida Pereira de Araújo dehan.
Nia dehan, pergunta sira inklui koñesimentu kona-ba oinsá atu sukat frekuénsia respirasaun labarik sira-nian no oinsá atu fó atendimentu ba labarik sira.
“Matéria ne’ebé sai iha teste ohin barak liu matéria espesífika. Ha’u prepara an mós ba matéria jerál, maibé matéria espesífika mak sai barak liu iha teste ne’e. Maske nune’e, Aguida konsege hetan pontu 62, ne’ebé liu pontu mínimu 60 atu pasa ba faze tuir mai,” nia dehan.
Tuir nia, rezultadu teste ne’e depende ba esforsu no preparasaun individuál, la’ós tanba familiarizmu.
“Ha’u hanoin katak teste ida-ne’e depende ba ita ida-idak nia esforsu no preparasaun. Se ita prepara an ho di’ak, ita bele hatán pergunta sira ho di’ak. Ha’u hetan pontu 62 no agradese ba rezultadu ne’e,” nia dehan.
Nune’e mós aplikante ba vaga referida, Adriano Olomau, afirma maske simu rezultadu la pasa maibé nia nafatin esforsu an, tanba nia ho nia valór 46.
“Sente triste tanba la konsege pasa teste eskrita, depois hetan pontu 46, ne’ebé menus husi pontu mínimu 60. Maske nune’e, ha’u simu rezultadu ne’e no konsidera katak kandidatu sira tenke simu rezultadu tuir pontu ne’ebé sira hetan, maibé ida-ne’e mak rezultadu ne’ebé ha’u hetan no ha’u tenke simu. Ha’u hetan pontu 46, tanba ne’e ha’u la konsege pasa” Adriano Olomau hateten.
Tuir nia observasaun, prosesu teste ne’e hala’o ho justu tanba kandidatu sira bele haree rezultadu depois ramata teste, la haree indikasaun kona-ba familiarizmu iha prosesu ne’e, no kandidatu sira tenke kompete tuir sira-nia kapasidade no preparasaun.
“Ha’u hanoin katak rezultadu ne’e depende ba ita ida-idak nia esforsu. Se ita prepara an ho di’ak, ita bele hetan rezultadu di’ak. Se la prepara, ita tenke simu rezultadu ne’ebé ita hetan,”Nia dehan.
Tanba, nia dehan, teste eskrita ne’e iha durasaun oras rua maibé kandidatu ne’ebé rmata sedu bele sai uluk, enkuantu sira-ne’ebé seidauk ramata bele kontinua halo no revee sira-nia resposta.
“Maske la pasa iha teste ida-ne’e, ha’u sei kontínua prepara an atu bele partisipa iha oportunidade rekrutamentu seluk tuir mai,”nia dehan.
Jornalista : Felicidade Ximenes
Editór : Cancio Ximenes
