Autoridade Vikeke estabelese KMPS atu hametin resposta ba dezastre naturál
VIKEKE, 26 Outubru 2026 (TATOLI)—Autoridade Munisipál Vikeke estabelese Konsellu Munisipál Protesaun Sivíl (KMPS), ne’ebé envolve diretór sira husi servisu munisipál, autoridade postu administrativu no xefe suku sira, atu hametin koordenasaun no resposta ba risku dezastre naturál ne’ebé bele akontese iha munisípiu ne’e.
Diretór Servisu Munisipál Jestaun Dezastre Naturál Vikeke, Carlos de Araújo Jeronimo, esplika katak estabelesimentu estrutura KMPS bazeia ba Dekretu-Lei Nú. 85/2023, ne’ebé regula servisu munisipál, define funsionamentu autoridade munisipál no estabelese estrutura téknika iha governasaun lokál.
“Nune’e, diploma ministeriál ida-ne’e mak fó dalan ba ita atu estabelese KMPS. KMPS sai hanesan órgaun integradu ida atu responde ba protesaun sivíl no hasoru risku dezastre sira-ne’ebé karik akontese iha Munisípiu Vikeke. Tanba, se servisu munisipál ida de’it mak responde ba dezastre, ha’u sente katak ida-ne’e la sufisiente. Tanba ne’e, ita envolve diretór sira hotu, inklui autoridade postu administrativu no xefe suku sira, atu servisu hamutuk ho maneira integrada,” Carlos de Araújo Jeronimo dehan iha serimónia estabelesimentu KMPS, ne’ebé hala’o iha salaun Munisípiu Vikeke, Segunda ne’e.
Nia dehan katak situasaun kalamidade bele akontese sein avizu, tanba ne’e presiza estabelese estrutura KMPS atu fó-atensaun ba dezastre naturál sira-ne’ebé bele afeta komunidade no infraestrutura sira iha Munisípiu Vikeke.
“Tanba ne’e, liuhusi estrutura KMPS, Prezidente Autoridade Munisipál (PAM) sai nu’udár lideransa, ho diretór sira, autoridade postu administrativu no xefe suku sira nu’udár parte husi estrutura. Bainhira dezastre akontese, ita bele responde lalais tanba iha ona estrutura no fásil atu halo koordenasaun iha baze. KMPS sei hala’o kna’ar atu responde bainhira akontese dezastre naturál,” nia akresenta.
Iha fatin hanesan, Prezidente Autoridade Munisipál Vikeke, Francisco Cruz Simões de Gonzaga Soares, subliña katak estabelesimentu KMPS iha papél importante atu hametin koordenasaun entre instituisaun sira-ne’ebé iha ligasaun ho dezastre naturál, tanba dezastre naturál reprezenta risku ba vida umana. Tanba ne’e, nia konsidera katak preparasaun sedu importante atu responde ba dezastre sira-ne’ebé akontese iha munisípiu ne’e.
“Ha’u fó parabéns ba komisaun ne’ebé estabelese KMPS tanba sira halo esforsu atu prepara estatutu sira. Durante ne’e, preokupasaun boot ida iha Munisípiu Vikeke mak dezastre naturál sira ne’ebé akontese beibeik kada tinan. Nune’e, ohin ita simu pose nu’udár membru KMPS, ho papél importante atu hametin koordenasaun entre instituisaun sira iha área protesaun sivíl, prepara no responde sedu ba komunidade sira-ne’ebé afetada husi dezastre naturál,” Francisco realsa.
Nia mós enkoraja membru KMPS sira atu mantein unidade no kooperasaun entre instituisaun, atubele servisu hamutuk ho di’ak no responde ho efikásia ba risku dezastre naturál sira.
Membru KMPS sira-ne’ebé simu pose kompostu husi Prezidente Autoridade Munisipál Vikeke, Komandante Polísia Nasionál Timor-Leste (PNTL) iha munisípiu ne’e, Autoridade Protesaun Sivíl (APC-sigla portugeza) Vikeke, Servisu Saúde Munisipál, Servisu Agrikultura, reprezentante sosiedade sivíl, instituisaun relevante sira seluk, administradór postu administrativu lima no xefe suku sira.
Kontestu
Munisípiu Vikeke kontinua enfrenta risku dezastre naturál, inklui inundasaun, anin-boot no rai-halai, ne’ebé bele afeta uma-kain, infraestrutura no seguransa komunidade nian. Tanba ne’e, preparasaun no koordenasaun entre instituisaun relevante sira importante atu hametin prevensaun, alerta sedu no resposta ba komunidade ne’ebé afetada.
Iha Setembru 2025, Autoridade Protesaun Sivíl (APC) Vikeke rejista ona uma-kain 175 ne’ebé afetadu husi dezastre naturál entre Janeiru no Setembru. Dezastre sira-ne’e inklui uma ne’ebé estraga tanba anin-boot, ahi no rai-halai.
Lee notísia relevante: Uma-kain 175 afetadu husi dezastre naturál iha Vikeke.
Iha 09 Outubru 2026, APC Vikeke mós informa kona-ba preparasaun atu hasoru fenómenu El Niño, ne’ebé bele hamosu bailoron naruk, falta bee no impaktu ba atividade agríkola no moris komunidade nian. APC mós planeia atu kontinua sosializasaun no fahe informasaun alerta sedu ba komunidade.
Lee mós: Preparasaun APC Vikeke hasoru El Niño.
Jornalista: Vitorino Lopes da Costa
Editór: Xisto Freitas da Piedade
