SEFOPE partilla informasaun Formasaun Profisionál no mobilidade laborál ba Xefe Estadu
DILI, 28 Outubru 2026 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, hasoru malu ho Prezidente Repúblika, José Ramos-Horta hodi partilla informasaun kona-ba servisu formasaun profisionál, empregu no traballu.
“Ha’u mai partilla informasaun ba Prezidente Repúblika, sobre servisu formasaun profisionál, empregu no traballu,” Rogerio Araújo Mendonça hateten ba jornalista sira iha Palásiu Prezidensiál, Nicolau Lobato Dili, hafoin ramata enkontru ho Prezidente Repúblika José Ramos-Horta, kuarta ne’e.
Nia informa, Prezidente Repúblika sei hala’o vizita traballu ba Korea Súl no husu SEFOPE atu update kona-ba servisu mobilidade laborál.
“Ita-nia Prezidente mós sei hala’o vizita traballu ba Korea, entaun husu Sekretariu Estadu Formasaun Profisionál no Empregu (SEFOPE) atu update fila-fali kona-ba servisu mobilidade laborál iha Korea Súl, Prezidente mós husu SEFOPE atu partilla área importante saida mak presiza hodi bele espanda. Buat ne’ebé ita asina ho Korea mak peska, fabríka no agrikultura, entaun SEFOPE rekomenda ba Prezidente atu halo negosia ba área importante seluk atu haruka ita-nia joven sira ba servisu,” nia hateten.
Iha enkontru ne’e mós ko’alia kona-ba vizita Prezidente nian ba Austrália hodi hametin liután kooperasaun bilaterál.
“Hasoru malu ne’e mós ko’alia kona-ba iha semana da-tolu fulan-Novembru Prezidente sei vizita ba tan Austrália hodi hametin liután kooperasaun bilaterál rai rua liuliu iha programa mobilidade laborál no ita-nia Prezidente sei ba haree direta kondisaun ita-nia traballadór sira iha Australia,” nia dehan.
Jornalista : Hortêncio Sanchez
Editór : Cancio Ximenes
