Timor-Leste no Repúblika Koreia hametin kooperasaun liuhusi Mekanizmu Konsulta Bilaterál

DILI, 28 Outubru 2026 (TATOLI)-Governu delibera atu aprova memorandu entendimentu entre Ministériu Negósiu Estranjeiru no Kooperasaun Timor-Leste no Ministériu Negósiu Estranjeiru Repúblika Koreia kona-ba Kriasaun Mekanizmu Konsulta Bilaterál.

Sekretáriu Estadu Komunikasaun Sosiál, Expedito Dias Ximenes hatete katak aprovasaun ne’e mandatu ba Vise-Ministru Negósiu Estranjeiru, Jesuína Maria Ferreira Gomes, atu asina memorandu entendimentu ne’e.

Nia esplika asinatura akordu ne’e hala’o iha ámbitu vizita badak Prezidente Repúblika nian bá Koreia Súl iha tempu badak nia laran.

Memorandu ne’e estabelese mekanizmu ida ba konsulta bilaterál periódika, ho objetivu atu hametin relasaun no kooperasaun entre nasaun rua, fasilita troka hanoin kona-ba kestaun bilaterál, rejionál no internasionál ne’ebé sai interese komún, no avalia progresu kooperasaun nian iha área sira ne’ebé bele inklui komérsiu, ekonomia, saúde, edukasaun, siénsia no teknolojia no agrikultura.

Konsulta sira ne’e sei hala’o iha nivel altu funsionáriu Ministériu Negósiu Estranjeiru idaidak nian, dala ida kada tinan rua ka bainhira de’it maka parte sira konsidera nesesáriu. Enkontru sira seli hala’o alternadamente iha Timor-Leste no Repúblika Koreia.

Jornalista: Arminda Fonseca 

Editora: Maria Auxiliadora