PN deside debate proposta lei OJE 2027 iha jeneralidade hahú 09 Novembru
DILI, 29 Outubru 2026 (TATOLI)–Sekretáriu Estadu Komunikasaun Sosiál (SEKOMS), Expedito Dias Ximenes, informa enkontru líder Bankada iha Parlamentu Nasionál ko’alia pontu tolu, maibé foka liu ba determinasaun loron debate proposta lei Orsamentu Jerál Estadu (OJE) 2027 nian.
Iha enkontru líder bankada ne’e ko’alia pontu tolu maibé ko’alia liu kona-ba determinasaun ba loron debate Orsamentu Jerál Estadu (OJE) 2027 nian. Enkontru ikus deside liuhusi proposta husi Prezidente Parlamentu Nasionál katak debate ba OJE 2027 iha jeneralidade sei hahú hala’o iha loron 09 to’o 11 fulan-Novembru 2026.
“Depois enkontru, ikus mai deside liuhusi proposta ne’ebé hato’o husi Prezidente Parlamentu Nasionál katak, debate ba OJE 2027 iha jeneralidade hahú loron 09 Novembru,” Governante hateten ba jornalista sira iha Parlamentu Nasionál, kinta ne’e.
Kona-ba debate iha espesialidade sei hahú iha loron 10 fulan-Novembru maibé sei adia ba loron 24 fulan-Novembru to’o ramata.
“Razaun muda tanba iha loron 13 fulan-Novembru, servisu Estadu nian, membru Parlamentu sira inklui Prezidente Parlamentu sei ba tuir interparlamentár ASEAN iha Filipina. Depois Primeiru-Ministru mós ho delegasaun sei ba partisipa iha Filipina, ida-ne’e mak debate ne’e sei pauza tiha, fila mai mak kontinua,” nia esplika.
Nia hatutan, OJE tinan ne’e sei debate ho karáter normál.
“OJE tinan ne’e sei debate ho karáter normál, ne’ebé prosesu hotu la’o normál,” nia konklui.
Jornalista : Hortêncio Sanchez
Editór : Cancio Ximenes
