Xanana relata TL nia preparasaun sai prezidénsia ASEAN 2029 ba Ramos-Horta
DILI, 29 Outubru 2026 (TATOLI)–Primeiru-Ministru, Kay Rala Xanana Gusmão, kinta ne’e, hasoru malu ho Prezidente Repúblika, José Ramos-Horta, relata servisu Governu nian inklui aprovasaun rejime espesiál aprovizionamentu ba reabilitasaun atu prepara Dili ba Prezidénsia ASEAN 2029.
“Ha’u enkontru semanál ho Prezidente Repúblika hodi informa servisu Governu nian. Ami aprova ona rejime espesiál aprovizionamentu ne’e atu prepara Dili ba Prezidénsia ASEAN,” Primeiru-Ministru, Kay Rala Xanana Gusmão, hateten ba jornalista sira hafoin hala’o enkontru ho Xefe Estadu iha Palásiu Prezidensiál Nicolau Lobato, Bairru Pite.
Antes ne’e, iha reuniaun Konsellu Ministru iha loron 28 fulan-Outubru aprova projetu Dekretu-Lei, ne’ebé aprezenta husi Ministru Obra Públika, Samuel Marçal, ne’ebé estabelese rejime aprovizionamentu espesiál ida hodi simplifika prosedimentu sira ba ezekusaun projetu prioritáriu sira hodi hadi’a asesibilidade no reabilitasaun sidade Dili.
Projetu ne’e ho objetivu atu garante finalizasaun tuir tempu loloos ba eventu sira-ne’ebé relasiona ho Prezidénsia Timor-Leste nian ba ASEAN, ne’ebé tuir planu sei hahú iha tinan 2029.
Rejime ne’e inklui sesaun neen husi estrada sira, dalan ba ema-la’o-ain no espasu públiku sira, substituisaun sistema eletrisidade públika iha rai leten ho sistema rai-okos, no instalasaun infraestrutura públika ba saneamentu, abastesimentu bee-moos no telekomunikasaun.
Diploma ne’e permite uza prosedimentu solisitasaun kotasaun ka ajuste diretu, la haree ba valór kontratu nian, sein sees husi prinsípiu aprovizionamentu públiku.
Implementasaun kabe ba Ministériu Obra Públika ho Komisaun Nasionál Aprovizionamentu, I.P, enkuantu Ajénsia Dezenvolvimentu Nasionál, I.P, mantein kompeténsia verifikasaun téknika no finanseira.
Jornalista : Hortêncio Sanchez
Editór : Cancio Ximenes
