Pe. Cimpliu: “Matebian sira mak sai guarda ba ita ne’ebé sei moris”
VIKEKE, 02 Novembru 2026 (TATOLI)–Selebrante misa loron finandu, Pe. Cimpliu Bou Mali, SVD, hateten matebian sira-ne’ebé fila ona ba mundu seluk ba hamutuk ho Maromak hodi sai fali gurada ida ba ema ne’ebé sei moris.
“Ohin ita hamutuk hodi selebra loron finadu ne’ebé sai loron espesiál ba ita-nia matebian sira-nian. Ita-nia matebian sira-ne’e balun fila sedu. Maibé, ita sira-ne’e ba hamutuk ho Maromak hodi sai anju Maromak nian hodi sai hanesan guarda ba ita ne’ebé sei moris iha mundu,” Pe. Cimpliu Bou Mali, SVD, hateten iha selebrasaun misa kapela iha Semitériu Uailalika, Suku Uaitame, Postu Uatulari, Segunda ne’e.
Na’i-Lulik ne’e fó-hanoin ba sarani sira katak liuhusi misa ba loron finadu ida-ne’e, atu sarani sira hatudu domin ba matebian sira-ne’ebé oras-ne’e hamutuk ona ho Maromak.
“Misa iha loron finadu ida-ne’e, ita husu misa ba ita-nia matebian sira oinsá ita hato’o ita-nia domin ba matebian sira liuhusi misa no orasaun,” Amu hateten.
Nune’e, nia dehan, depoizde misa hotu sei kari ai-funan no lilin ba matebian sira-nia semitériu, ai-funan no lilin ne’ebé sarani sira prepara lahanesan ho ai-funan sira ne’ebé baibain fó prezente ba malu.
“Maibé, ai-funan ida-ne’e mak ita sei kari iha matebian sira-nia rate hodi hatuur ita-nia domin, inklui lilin ne’ebé ita prepara ne’e ita sunu iha rate fó naroman ba ita-nia matebian sira,” nia akresenta.
Loron finadu kada tinan (selebra iha 02 Novembru) mak loron espesiál ida iha Timor-Leste no mundu Katóliku hodi hanoin, reza, no hatudu domin ba matebian sira.
Tuir observasaun jornalista TATOLI katak misa selebrasaun ba loron finadu ne’ebé realiza iha Kapela Semitériu Uailalika hahú tuku 03:30 lokraik, família sira husi matebian sira lori ai-funan no lilin hodi husu misa no fó bensaun ba ai-funan, lilin.
Hafoin misa ramata família sira husi matebian idaidak nian kontinua lori hahán sira tau iha semitériu, símbulu han hamutuk ho matebian sira. Depoizde han ramata kontinua kari ai-funan no sunu lilin iha matebian sira-nia rate.
Serimónia selebrasaun loron finadu ne’ebé iha Semitériu Uailalika la’o hakmatek hetan akompaña husi Ofisiál Polisiamentu Suku (OPS) husi PNTL Eskuadra Uatulari.
Entretantu, misa selebrasaun loron matebian ne’e hetan partisipa husi autoridade lokál, veteranu no hetan partisipa másimu husi komunidade Suku Uaitame.
Jornalista: Vitorino Lopes da Costa
Editóra: Xisto Freitas da Piedade
