APORTIL kontribui resita $926.124,87 ba kofre Estadu
DILI, 04 Novembru 2026 (TATOLI)—Administrasaun Portu Timor-Leste, Institutu Públiku (APORTIL, I.P), iha trimestre datoluk ne’e, kontribui reseita ba kofre Estadu hamutuk $926.124,87 ne’ebé rekolla husi fonte sira hanesan atividade operasaun ró, armazen kobertu no deskobertu, estasionamentu no faan bee-moos.
Xefe Departamentu Kontrolu no Rekolla Reseitas iha APORTIL, Narcisio Eli da Silva, reseita hateten iha trimestre datolu nian sira kontribui reseitas hamutuk $926,124.87, kompara ho tinan kotuk reseitas sa’e uitoan $1,343,125.01.
“Reseita sira-ne’e tun tanba ita-nia fatin agora muda tiha mai Tasi-Tolu no espasu baibain fó ema aluga halo konsertu nian. Laiha ona no fatin armajen fó ba kompañia sira rai sira-nia materiál mós agora laiha ona,” Xefe Departamentu Kontrolu no Rekolla Reseitas iha APORTIL, Narcisio Eli da Silva, hateten ba Tatoli iha nia kna’ar fatin Karantina Tasi-Tolu, ohin.
Maibé, nia dehan, sira sei iha tan atividade seluk ne’ebé bele ajuda kontribui reseita ba kofre Estadu no reseita boot liu sira rekolla husi operasaun ró Berlin Nakroma no Ramelau.
“Ne’e tanba agora ita-nia oráriu viajen ne’e aumenta tan, la’ós hanesan uluk viajen ba Ataúru iha de’it loron sábadu, maibé agora kuaze semana ida ró tolu ne’e halo hotu operasaun ba Oekusi no Ataúru,” nia hateten.
Enkuantu, husi reseita ne’ebé mensiona kompostu hus, ró ahi $133.46, ró yacth $401.48, ró besi, mina mell soraya $144.174,34, ró privadu succes $32.103,48, ró Berlin Nakroma $372.720,00 ró Berlin Ramelau $312.853,75.
Armazen deskobertu $8.933,40, estasionamentu $23.029,20, armazen kobertu $5.000,00 no atividade faan bee-moos $5.620,00.
Jornalista : Alexandra da Costa
Editór : Cancio Ximenes
