El Niño, Xanana orienta MAPPF-MNEK halo negosiasaun ho Tailándia-Vietname asegura estoke foos
DILI, 04 Novembru 2026 (TATOLI)—Primeiru-Ministru, Kay Rala Xanana Gusmão, orienta Ministériu Agrikultura Pekuária Peska no Floresta (MAPPF) no Ministériu Negósiu Estranjeiru Kooperasaun (MNEK) halo negosiasaun bilaterál ho Vietname no Tailándia ne’ebé iha produsaun foos barak atu asegura estoké iha tempu “Elnino”.
Sekretáriu Estadu Komunikasaun Sosiál, Expedito Dias Ximenes, dehan ohin Primeiru-Ministru mós husu ba membru governu ne’ebé iha relasaun responsabilidade ho kestaun el niño ne’ebé akontese bailoro naruk iha ita-nia rejiaun.
“Tanba ne’e, Xefe Governu husu ba MAPPF no MNEK atu prepara alternativa liuhusi enkontru negosiasaun bilaterál ho nasaun sira-ne’ebé iha produsaun foos ne’ebé maka’as hanesan Tailándia no Vietname,” Governante ne’e hateten ba jornalista sira iha Palásiu Governu, ohin.
Nune’e, nia hatutan, bainhira iha situasaun bailoro naruk bele asegura aihan hodi konsumu loro-loron.
“Aleinde ba MOP mós tenke haree atensaun kona-ba bee-moos iha tempu bailoro naruk no MKI atu asegura nafatin estabilidade nesesidade báziku ne’ebé ita importa, nune’e populasaun labele sente falta aihan iha tempu el niño,” nia hateten.
Enkuantu, nia dehan, ba Ministériu Solidariedade Sosiál no Inkluzaun kontinua haree nafatin ba apoiu umanitária no preparasaun responsta ba kazu emerjénsia ne’ebé mosu ho kestaun el niño nian.
Jornalista : Alexandra da Costa
Editór : Cancio Ximenes
