Reabilitasaun Sítiu Turizmu Bee-Luli Manas iha Vikeke atinje ona progresu fíziku signifikante
VIKEKE, 04 Novembru 2026 (TATOLI)—Xefe Suku Uaimori, Postu Administrativu Vikeke Vila, Munisípiu Vikeke, Francelino António Gomes, relata katak progresu fíziku ba obra reabilitasaun sítiu turizmu komunitáriu Bee-Luli Manas, ne’ebé lokaliza iha Suku Uaimori, atinje ona 5,26%.
Francelino hateten katak, antes ne’e, iha parte balun husi obra reabilitasaun ne’e nia ezekusaun la’o la tuir kualidade ne’ebé espera, nune’e nia halo intervensaun atu asegura kualidade obra nian. Maski nune’e, nia asegura katak intervensaun ne’e la’ós atu impede servisu, maibé atu garante katak obra ne’e kumpre padraun kualidade.
“Kona-ba obra reabilitasaun Bee-Luli Manas, antes ne’e iha servisu balun ne’ebé la’o la tuir kualidade ne’ebé espera. Ha’u rasik mak halo intervensaun ba obra ne’e, maibé ha’u-nia intensaun la’ós atu impede servisu, maibé atu garante kualidade obra nian. Tanba ne’e, ha’u kontinua akompaña obra ne’e to’o agora, no servisu kontinua la’o hela,” Francelino hato’o ba TATOLI, iha Postu Administrativu Vikeke Vila, Kuarta ne’e.
Autoridade komunitária ne’e esplika katak obra reabilitasaun ne’e inklui hadi’a uma, harii uma-sanitária no instala rede hale’u área Sítiu Turizmu Bee-Luli Manas, atu asegura kondisaun no ambiente iha fatin turizmu ne’e.
Nia mós hateten katak empreza responsável aprezenta ona karta deklarasaun ba autoridade lokál, ne’ebé konfirma kompromisu atu ramata obra tuir prazu ne’ebé define iha kontratu.
“Empreza mós aprezenta karta deklarasaun ba ami, katak servisu reabilitasaun ne’e tenke ramata tuir durasaun servisu ne’ebé hakerek iha kontratu. Tanba ne’e, ami sei kontinua akompaña servisu to’o obra ramata,” nia hato’o.
Iha parte seluk, Diretór Programa Dezenvolvimentu Integradu Munisípiu (PDIM) Vikeke, Joaquim Fernandes, haktuir katak projetu reabilitasaun Sítiu Bee-Luli Manas ne’e kontinua iha faze ezekusaun, ho empreza responsável hala’o hela servisu konstrusaun iha terrenu.
“Obra reabilitasaun Sítiu Turizmu Bee-Luli Manas agora daudaun empreza responsável mak hala’o hela. To’o agora, empreza ne’e hadi’a hela instalasaun sira iha área turizmu no harii rede hale’u fatin turizmu. Progresu fíziku atinje ona 5,26%,” Joaquim Fernandes hato’o.
Depoizde konklui, obra reabilitasaun ne’e sei fó benefísiu ba komunidade lokál, vizitante no turista nasionál sira-ne’ebé hakarak vizita Sítiu Turizmu Bee-Luli Manas, ne’ebé iha bee-manas nia fonte naturál, iha Munisípiu Vikeke.
Projetu ne’e hahú konstrusaun iha fulan-Jullu 2026, ho orsamentu husi Autoridade Munisipál Vikeke ba tinan fiskál 2026. Total orsamentu ba projetu reabilitasaun no espansaun Sítiu Turizmu Bee-Luli Manas, inklui rede hale’u, mak US$245.622. Projetu ne’e iha durasaun ezekusaun fulan neen, no empreza responsável ba implementasaun mak Prify Unipessoal, Lda.
Kontestu
Fatin turizmu Bee-Luli Manas lokaliza iha Suku Uaimori, Postu Administrativu Vikeke Vila, Munisípiu Vikeke. Fatin ne’e dezenvolve hosi Governu liuhosi Sekretaria Estadu Formasaun Profisionál no Empregu (SEFOPE), iha tinan 2021, atu transforma bee-manas naturál ne’e sai destinasaun turizmu komunitáriu.
Iha tempu ne’ebá, fasilidade ne’ebé konstruida inklui pisina ba adultu no labarik, fatin deskansa ba vizitante, fatin troka roupa, fasilidade sanitária públika, mini-kafetária no mini-merkadu.
Depoiz, iha 06 Novembru 2022, Ministériu Turizmu, Komérsiu no Indústria (MTKI) lansa ofisialmente Sítiu Turizmu Bee-Luli Manas ba públiku, atu fasilita vizitante sira asesu ba destinasaun turizmu ne’e.
Iha tempu hanesan, asesibilidade estrada sai mós hanesan dezafiu ba dezenvolvimentu sítiu turizmu ne’e. TATOLI, iha 14 Janeiru 2022, relata katak estrada ho naruk besik kilómetru haat (4 km) ne’ebé liga Suku Bibileo ba Bee-Luli Manas iha kondisaun aat, nune’e difikulta vizitante sira atu asesu ba fatin ne’e.
Lee notísia relevante sira:
- Governu dezenvolve ‘Bee-Luli Manas’ Waimori sai fatin turístiku – 27 Jullu 2021.
Klik iha-ne’e hodi lee notísia relevante. - MTKI lansa sítiu Bee-Luli Manas Vikeke ba publiku – 06 Novembru 2022.
Klik iha-ne’e hodi lee notísia relevante. - Estrada kilómetru haat (4) asesu bá Bee-Luli Manas Vikeke ho kondisaun aat
- Klik iha-ne’e hodi lee notísia relevante.
Jornalista: Vitorino Lopes da Costa
Editór: Xisto Freitas da Piedade
