Xefe Governu husu atensaun ba MS prepara planu sosa ai-moruk iha 2027
DILI, 04 Novembru 2026 (TATOLI)—Primeiru-Ministru, Kay Rala Xanana Gusmão, husu atensaun ba Ministériu Saúde atu prepara planu prioridade sosa ai-moruk no garante nafatin estoke ai-moruk ba atendimentu iha tinan 2027.
Sekretáriu Estadu Komunikasaun Sosiál, Expedito Dias Ximenes, informa Primeiru-Ministru husu atensaun ba Ministériu Saúde hodi haree kona-ba estoke ai-moruk iha situasaun agora.
“Tenke iha planu prioridade ai-moruk ida-ne’ebé mak presiza atu sosa tuir moras ne’ebé iha no tenke haree ba ninia kuantidade,” Sekretáriu Estadu Komunikasaun Sosiál, Expedito Dias Ximenes, hateten ba jornalista sira iha Palásiu Governu, ohin.
Nia hatutan, iha tinan 2027 ne’e Governu tenke fó atensaun ba atendimentu sira atu labele akontese stock out, dalabarak ai-moruk ne’ebé ita sosa la tuir ninia prioridade entaun bele afeta ba espiradu entaun ita estraga de’it ai-moruk no osan.
“Tanba ne’e mak Xefe Governu fó atensaun sosa ai-moruk tuir dadus ba kazu moras ne’ebé iha,” nia dehan.
Jornalista : Alexandra da Costa
Editór : Cancio Ximenes
