AEMTL konsidera ezisténsia BNDTL fó oportunidade ba emprezária feto
DILI, 05 Outubru 2026 (TATOLI)—Asosiasaun Emprezálariál Feto Timor-Leste (AEMTL) konsidera ho ezisténsia Banku Nasionál Dezenvolvimentu Timor-Leste (BNDTL) bele fó mós oportunidade investimentu emprezária feto iha mikro pekena empreza nian.
Prezidente AEMTL, Hergui Luina Fernandes Alves, hateten ohin sira enkontru ho Primeiru-Ministru, Kay Rala Xanana Gusmão, atu aprezenta de’it relatóriu kona-ba rezultadu primeira konferénsia nasionál ba feto emprendedora ne’ebé foin daudauk ne’e hala’o iha 24 to’o 25 Outubru 2026.
Tanba ne’e mensajen husi Primeiru-Ministru mak kontinua servisu tanba iha tempu badak Governu sei hari’i Banku Nasionál Dezenvolvimentu Timor-Leste (BNDTL) hodi apoiu emprezariál feto sira sai hanesan mós benefisiáriu.
“Progresu husi relatóriu ne’e seidauk to’o iha rezultadu finál, nune’e seidauk bele anúnsia sai, bainhira komoleta ona mak ita bele públika sai. Maibé importante liu mak oinsá atu organiza feto sira iha mikro pekeña, médiu emprensa hodi dezenvolve bazeia ba potensialidade nasaun nian,” Prezidente AEMTL relata ba jornalista sira iha Palásiu Governu, ohin.
Kona-ba potensialidade sira-ne’e, nia dehan, iha ona diskusaun nia laran enkuantu iha relatóriu finál mak foin deside loloos hodi kontribui ba prosesu dezenvolvimentu.
“Maibé, planu ne’ebé ita atu implementa mak hanesan iha setór turizmu, agrikultura no setór potensialidade sira seluk ne’ebé bele eleva diverfisikasaun ekonomia iha nasaun,” nia esplika.
Nia hatutan, daudaun ne’e membru emprezária feto ne’ebé rejistadu no naun-rejistadu iha AEMTL hamutuk 2014.
Jornalista : Alexandra da Costa
Editór : Cancio Ximenes
