Autoridade Suku Bahatata husu Governu prioriza estrada Uatukarbau–Bahatata iha OJE 2027
VIKEKE, 05 Novembru 2026 (TATOLI)—Xefe Suku Bahatata, Postu Administrativu Uatukarbau, Munisípiu Vikeke, Patrício Maria Pinto, husu Governu atu prioriza reabilitasaun estrada rurál ne’ebé liga Postu Administrativu Uatukarbau ho Suku Bahatata iha Orsamentu Jerál Estadu (OJE) 2027, atu fasilita asesu komunidade, ne’ebé durante tinan barak enfrenta difikuldade tanba kondisaun estrada aat.
“Orsamentu ba tinan 2027 besik atu debate ona. Nune’e, ami la husu buat barak ba Estadu, maibé ami-nia ezijénsia mak infraestrutura bázika, liuliu estrada ne’ebé liga ba ami-nia suku. Kuaze tinan barak ona ami enfrenta problema estrada ne’e, maibé to’o agora Governu seidauk hadi’a. Ami-nia prioridade iha OJE 2027 mak hadi’a ami-nia estrada,” Patrício Maria Pinto dehan ba TATOLI iha Postu Administrativu Uatukarbau, Kinta ne’e.
Autoridade komunitária ne’e rekomenda katak, iha prosesu debate OJE 2027 iha Parlamentu Nasionál (PN), deputadu sira-ne’ebé reprezenta povu tenke konsidera infraestrutura estrada nu’udár prioridade, tanba estrada importante atu liga atividade hotu-hotu, inklui atividade ekonómika iha área rurál.
“Tanba kondisaun estrada aat, agrikultór sira sempre enfrenta difikuldade atu lori sira-nia produtu lokál bá merkadu, liuliu iha tempu udan. Tanba ne’e, ami husu Governu atu hadi’a estrada hodi fasilita movimentu ema no transporte sira,” nia hato’o.
Nia konta katak, durante tempu udan-boot, komersiante ne’ebé lori sasán nesesidade bázika ho karreta husi Uatulari no Baukau la konsege asesu to’o Suku Bahatata. Situasaun ne’e hamosu impaktu ba komunidade, liuliu tanba folin sasán sira sa’e.
“Ami hela iha área rurál ho kondisaun estrada aat, ne’ebé halo ema seluk mós ladún mai vizita ami. Se sira mai vizita, karik sira bele sente diretamente kondisaun estrada ne’ebé ami enfrenta durante tinan naruk ona,” nia realsa.
Ho nune’e, nia husu Ministériu Obra Públika (MOP) atu tau iha prioridade reabilitasaun estrada ne’ebé liga Postu Administrativu Uatukarbau ho Suku Bahatata, atu komunidade bele hetan asesu di’ak.
“Aleinde ne’e, ami mós husu MOP atu, se agora seidauk bele halo reabilitasaun kompleta, orienta IGEADI, I.P. atu aterru temporáriu, nune’e komunidade bele asesu. Estrada ne’ebé husi Postu Administrativu Uatukarbau to’o Suku Bahatata ne’e nia naruk hamutuk kilómetru 21,” nia esplika.
Tuir dadus populasaun, Suku Bahatata iha abitante hamutuk na’in-980 no uma-kain hamutuk 193.
Kontestu
Prosesu preparasaun no diskusaun OJE 2027 hahú ona iha Parlamentu Nasionál, depoizde Governu liuhusi Ministériu Finansa entrega proposta Lei OJE 2027 iha loron 01 Outubru 2026, ho montante globál Millaun US$2.568,5.
Parlamentu Nasionál marka debate proposta OJE 2027 iha faze jeneralidade ba loron 09 to’o 11 Novembru 2026, enkuantu diskusaun iha faze espesialidade sei kontinua hosi loron 24 Novembru. Proposta orsamentál ne’e inklui alokasaun ba infraestrutura, edukasaun, saúde, protesaun sosiál no área dezenvolvimentu seluk.
Iha sorin seluk, Governu mós hatudu kompromisu atu kontinua fó prioridade ba infraestrutura bázika iha área rurál hanesan estrada, eskola no klínika, atu fasilita asesu komunidade ba servisu públiku no atividade ekonómika.
Dadus husi sistema monitorizasaun projetu infraestrutura ADN, I.P. mós hatudu katak iha projetu reabilitasaun estrada rurál balun iha área Uatukarbau no Bahatata, inklui troñu Uidasu–Nabo no Nabo–Daragata. Projetu sira-ne’e hatudu katak infraestrutura estrada iha área ne’e sai ona parte husi programa dezenvolvimentu rurál.
Klik notísia relevante sira iha kraik hodi lee:
- Governu aprezenta Proposta Lei OJE 2027 ba Parlamentu Nasionál – TATOLI, 1 Outubru 2026.
- PN deside debate proposta lei OJE 2027 iha jeneralidade hahú 09 Novembru – TATOLI, 29 Outubru 2026.
- Panorama Orsamentál 2027 akontese iha semana oin – TATOLI, 8 Outubru 2026.
- Governu Fó Prioridade ba Infraestrutura Báziku iha Área Rurál liu husi OJE 2027 – SECOMS, 23 Outubru 2026.
- ADN, I.P. – Dadus monitorizasaun projetu reabilitasaun estrada rurál iha área Bahatata.
Jornalista: Vitorino Lopes da Costa
Editór: Xisto Freitas da Piedade
