DNTT Bobonaru funsiona hikas atendimentu ba renovasaun dokumentu transporte sira
BOBONARU, 05 Novembru 2026 (TATOLI) – Diresaun Nasionál Transporte Terrestre (DNTT) Munisípiu Bobonaru kontinua fali atendimentu ba renovasaun dokumentu transporte sira hafoin falla iha liña internét, ne’ebé halo komunidade hein kle’ur komesa iha loron 03 to’o 05 Novembru dadeer ne’e.
Sidadaun husi postu administrativu Lolotoe, Paul Mendes, hatete katak nia la kontente ho situasaun ne’e tanba durante loron rua hein atu renova dokumentu ba inspesaun veíkulu, maibé atendimentu seidauk funsiona tanba sistema avaria.
“Ha’u mai husi Lolotoe, hein ona loron rua atu renova dokumentu, maibé sira dehan sistema la di’ak hela de’it. Ida-ne’e difikulta tebes ami motorista atu kontinua halo viajen bá fatin seluk, tanba dokumentu besik mate, presiza renova tiha mak foin bele la’o”, Paul Mendes hato’o lamentasaun durante entrevista ho jornalista sira iha edifísiu DNTT Bobonaru, kinta-feira ne’e.
Kliente sira hein hela iha edifísiu DNTT munisípiu Bobonaru atu trata dokumentu maibé sistema avaria. Foto Tatoli/Sergio da Cruz.
Nia husu ba entidade kompetente atu hadi’a sistema ne’e, tanba komunidade seluk hakarak kumpre lei hodi kontribui taxa ba Estadu no presiza dokumentu transporte atu kontinua atividade loroloron.
“Ami hakarak kumpre lei no selu taxa, maibé Governu mós tenke responde ba ami-nia nesesidade, tanba ami mós iha atividade seluk ne’ebé presiza halo. Transporte barak mak agora seidauk renova dokumentu”, nia salienta.
Tanba ne’e, komunidade la simu bainhira dokumentu ne’ebé nia prosesa ona antes data validade ramata, depois hetan multa tanba sistema avaria no atendimentu la konsege rezolve iha tempu.
“Ami la simu no prontu atu hasoru boot sira para rezolve, tanba ami-nia doukument seidauk mate mak ami mai, ida ne’e ami presiza ministeriu kompetente klarifika buat ruma ba ami para ami iha Bobonaru bele komprende”, nia dehan.
Diretór Delegasaun Territoriál Transporte Terrestre Munisípiul Bobonaru, Tomás Maia, esplika katak falla iha sistema ne’e mosu iha sentru Dili no afeta munisípiu hotu, inklui Baukau, Ermera, Ainaru no Aileu.
Tomás Maia hatete katak ekipa téknika halo ona manutensaun hodi rezolve problema ne’e. “Agora iha munisípiu balun di’ak ona, ita-nia daudaun halo manutensaun ba cabang iha kantor oin ne’e para rezolve tiha”, nia realsa.
Nia esklarese katak dokumentu inspesaun no dokumentu seluk ne’ebé validade remata durante sistema avaria ne’e sei la konsidera mate no la hetan multa. “Ita bele edit fali iha sistema para labele multa, maibé tenke tau justifikasaun”, nia akrexenta.
Tomás Maia mós informa katak ofisiál tékniku husi DNTT kontinua halo kontrolu no manutensaun ba problema falla iha liña internét ne’e no daudaun konsege rezolve ona.
Notísia relevante: DNTT Bobonaru no PNTL husu komunidade aumenta disiplina iha estrada hodi redús asidente
Jornalista: Sergio da Cruz
Editora: Maria Auxiliadora
