Forsa Armada EUA no CVTL hala’o treinamentu primeiru sokoru iha Baukau
BAUKAU, 05 Novembru 2026 (TATOLI)—Ekipa Envolvimentu Oseania hosi Ezérsitu Estadu Unidu Amérika (EUA), hamutuk ho Cruz Vermelha de Timor-Leste (CVTL), hala’o treinamentu kona-ba primeiru sokoru iha Baukau, Kinta ne’e, atu hasa’e kapasidade komunidade lokál nian iha resposta ba situasaun emerjénsia.
Kapitaun hosi ekipa militár EUA, Carlos Colato, esplika katak treinamentu ne’e iha objetivu atu hasa’e kapasidade lokál, liuliu habelar abilidade no hametin koñesimentu komunidade nian, hodi bele responde lalais no ho maneira apropriada bainhira akontese situasaun emerjénsia.
“Estadu Unidu konsidera Timor-Leste nu’udár parseiru importante, no treinamentu ne’e mak parte ida hosi apoiu atu responde ba nesesidade ne’ebé iha komunidade,” Colato hateten iha edifísiu CVTL, Vila Nova, Baukau.
Colato relata katak kooperasaun entre forsa EUA no CVTL fó treinamentu ba membru Autoridade Protesaun Sivíl (APC-sigla portugeza), Bombeiru no estudante sira, tanba konsidera partisipante sira-ne’e nu’udár elementu importante iha komunidade. Sira sei kontinua ativu iha sosiedade no bele kontribui ba resposta iha situasaun emerjénsia iha futuru.
Aleinde ne’e, treinamentu ne’e mós atu kompleta matéria importante sira no hametin programa formasaun ne’ebé CVTL oferese ona, liuliu kona-ba tékniku prinsipál sira, hanesan uza tourniquet atu kontrola raan sai barak bainhira ema hetan kanek grave.
Nia esplika katak téknika ne’e importante tebes bainhira hasoru situasaun emerjénsia, tanba bele ajuda salva vida vítima sira-ne’ebé hetan kanek grave. Iha treinamentu ne’e, ekipa hala’o demonstrasaun direta no fó apoiu materiál ba Bombeiru no CVTL, atubele uza iha programa formasaun sira tuirmai.
“Apoiu ne’e la’ós de’it atu fó treinamentu, maibé inklui fornese ekipamentu no materiál sira atu garante programa treinamentu iha futuru,” nia akresenta.
Kapitaun Carlos Colato argumenta katak EUA kontinua harii parseria ne’ebé forte no sustentável ho komunidade Baukau, liuhusi apoiu iha área edukasaun, formasaun no reziliénsia komunidade.
Iha fatin hanesan, Reprezentante APC Baukau, Januário Freitas Pereira, hato’o agradese ba forsa EUA ne’ebé fó apoiu ba formasaun primeiru sokoru ne’e. Nia konsidera treinamentu ne’e importante tebes ba instituisaun Protesaun Sivíl, liuliu iha área prevensaun no mitigasaun dezastre.
“Treinamentu ne’e aumenta koñesimentu no kapasidade atu fó asisténsia dahuluk bainhira akontese situasaun emerjénsia iha terrenu,” nia hateten.
Kontestu
Formasaun kona-ba primeiru sokoru sai parte importante ida hosi esforsu atu hametin prontidaun komunidade no instituisaun sira bainhira hasoru situasaun emerjénsia ka dezastre. Iha Timor-Leste, CVTL servisu hamutuk ho instituisaun governu no parseiru internasionál sira atu hasa’e koñesimentu no abilidade komunidade nian, inklui téknika asisténsia dahuluk, CPR, tratamentu ba kanek no uza ekipamentu emerjénsia.
Iha Munisípiu Baukau, esforsu hametin kapasidade resposta ba dezastre mós hetan apoiu hosi Programa Nasaun Unida ba Dezenvolvimentu (UNDP-sigla ingleza) no Autoridade Protesaun Sivíl. Iha Setembru 2025, instituisaun rua ne’e hala’o treinamentu atualizasaun kona-ba Sistema Resposta Emerjénsia Timor-Leste (TERS), ho partisipasaun funsionáriu APC na’in-20 iha Baukau. Treinamentu ne’e ho objetivu atu hametin preparasaun no koordenasaun instituisionál bainhira akontese dezastre.
Iha 2026, CVTL mós hala’o formasaun ekipa resposta ba dezastre iha nivel nasionál, ho partisipante hosi nia ajénsia 13, atu hasa’e koñesimentu tékniku, koordenasaun no prontidaun atu fó asisténsia umanitária bainhira akontese emerjénsia.
Klik notísia relevante sira iha kraik hodi lee:
- CVTL hametin reziliénsia komunidade liuhusi programa treinamentu Primeiru Sokoru.
- Lansa programa prontidaun no resposta ba dezastre iha Timor-Leste.
- UNDP no APC hametin resposta lokál ba dezastre liuhusi Sistema Resposta Emerjénsia Timor-Leste (TERS) iha Baukau.
- CVTL hametin kapasidade resposta nasionál liuhusi treinamentu National Response Team durante loron lima.
Jornalista: Natalino Belo
Editór: Xisto Freitas da Piedade
