PAM Vikeke husu empreza sira aselera obra PDIM no garante kualidade

VIKEKE, 05 Novembru 2026 (TATOLI)—Prezidente Autoridade Munisipál (PAM) Vikeke, Francisco C. S. de Gonzaga Soares, apela ba empreza sira-ne’ebé implementa projetu Programa Dezenvolvimentu Integradu Munisipál (PDIM) atu aselera servisu fíziku no asegura kualidade obra, hodi atinje progresu mínimu 60% ba projetu sira iha tinan 2026, tuir orientasaun Governu Sentrál.

Francisco hato’o apelu ne’e iha enkontru estraordináriu ho diretór no enjiñeiru hosi kompañia sira-ne’ebé envolve iha implementasaun projetu PDIM, ne’ebé hala’o iha salaun Autoridade Munisipál Vikeke, Kinta ne’e. Enkontru ne’e iha objetivu atu atualiza informasaun kona-ba progresu ezekusaun fízika projetu sira.

“Ha’u husu ba emprezáriu no diretór kompañia sira atu aselera prosesu ezekusaun servisu fíziku obra, hodi asegura katak projetu sira iha tinan 2026 bele atinje progresu mínimu 60%, tuir rekizitu ne’ebé Governu Sentrál estabelese. Tanba ne’e, ohin ha’u konvoka enkontru estraordináriu ho diretór no enjiñeiru hosi kompañia sira-ne’ebé envolve iha implementasaun projetu PDIM, ho objetivu atu atualiza progresu ezekusaun fízika projetu sira,” Francisco dehan.

Prezidente Autoridade Munisipál Vikeke ne’e sujere ba emprezáriu sira atu fó-atensaun ba progresu servisu iha terrenu, inklui asegura kualidade obra no kumprimentu ba prazu ezekusaun, atu projetu sira bele ramata tuir planu no fó benefísiu ba komunidade.

“Maski nune’e, ita haree katak iha progresu pozitivu balun ne’ebé atinje ona 75% iha servisu fíziku. Ezemplu ida mak projetu konstrusaun irrigasaun Aenau, Suku Ossorua, ho naruk kilómetru 2,5, ne’ebé implementa hosi empreza Kay Sen Unipessoal, Lda. Tanba ne’e, liuhusi sorumutu ida-ne’e, empreza sira tenke aselera servisu no nafatin asegura kualidade, atu fó benefísiu ba komunidade,” Francisco subliña.

Tuir dadus Autoridade Munisipál Vikeke, projetu PDIM ba períodu 2024–2026 kompostu hosi projetu sira iha tinan tolu. Ba tinan 2024, iha projetu ida mak konstrusaun estrada ne’ebé liga bá fatin lixu, ho orsamentu alokadu hamutuk US$237.861,84.

Enkuantu ba tinan 2025, iha projetu hamutuk lima, inklui reabilitasaun Merkadu Olobai, ne’ebé ramata ona, reabilitasaun Sentru Saúde Uatukarbau, konstrusaun Uma Maternidade Uatulari, konstrusaun irrigasaun Uelafua no reabilitasaun irrigasaun Futudu Buanura. Projetu lima ne’e iha orsamentu totál US$1.025.064,41, no tuir informasaun autoridade nian, projetu sira-ne’e besik ramata.

Ba tinan 2026, Autoridade Munisipál Vikeke implementa projetu hamutuk 14, ho orsamentu totál US$3.273.924,28. Projetu hirak ne’e kompostu husi:

1. Konstrusaun Irrigasaun Laudei–Leba Crabi, ho naruk kilómetru rua.
2. Konstrusaun foun Sentru Saúde Internamentu Uatulari.
3. Konstrusaun Merkadu Bebui, Postu Administrativu Uatulari.
4. Konstrusaun Armazein Agrikultura Produtu Lokál Munisípiu Vikeke.
5. Konstrusaun Fatin Turizmu Istóriku Bahaneo, Ossú.
6. Konstrusaun foun Postu Saúde Loiulu, Uatukarbau.
7. Reabilitasaun no espansaun Fatin Turizmu Bee-Luli Manas, Redi Hale’u.
8. Konstrusaun foun Eskola Pré-eskolár (EPE) Kakatua Lugasa.
9. Konstrusaun Irrigasaun Uaiboru-Naha, ho naruk kilómetru rua.
10. Konstrusaun Fatin Turizmu Fabo ba We-Tasi.
11. Konstrusaun Postu Saúde Baulale.
12. Konstrusaun Irrigasaun Tuan ba Natar Lafaek Hasan.
13. Konstrusaun Fatin Turizmu Didimera.
14. Konstrusaun Irrigasaun Aenau, Ossorua, ho naruk kilómetru 2,5.

Projetu sira-ne’e iha tinan 2026 daudaun ne’e iha faze implementasaun.

Iha fatin seluk, tékniku hosi empreza Lekduadyti Unipessoal, Lda., Ambrosio Moniz de Carvalho, haktuir katak sorumutu ho Prezidente Autoridade Munisipál Vikeke ne’e atu fó orientasaun ba empreza sira-ne’ebé kaer obra PDIM, hodi aselera servisu konstrusaun sira, inklui konstrusaun Sentru Saúde Internamentu iha Postu Administrativu Uatulari.

“Iha sorumutu entre ami empreza no autoridade ne’e, sira fó orientasaun ba ami atu aselera obra PDIM nian. Ami-nia obra konstrusaun Sentru Saúde Internamentu ne’e kompostu hosi edifísiu lima kompostu husi edifísiu prinsipál ida, uma internamentu, edifísiu izolamentu, mortuáriu (fatin rai mate-isin), no koziña ho armazén. To’o agora, ami hada ona fundasaun edifísiu no sinta, nune’e progresu servisu atinje ona 10,30%. Ami-nia traballadór sira kontinua servisu iha terrenu,” nia hato’o.

Kontestu

Programa Dezenvolvimentu Integradu Munisipál (PDIM) nu’udár programa dezenvolvimentu ne’ebé implementa iha nivel munisipál, ho objetivu atu responde ba nesesidade infraestrutura no dezenvolvimentu komunidade, liuliu iha setór agrikultura, saúde, infraestrutura públika no turizmu.

Iha 09 Maiu 2026, Prezidente Autoridade Munisipál Vikeke, Francisco C. S. de Gonzaga Soares, informa katak Munisípiu Vikeke sei implementa projetu PDIM hamutuk 14 iha tinan 2026, ho prioridade ba konstrusaun sistema irrigasaun, infraestrutura saúde no dezenvolvimentu fatin turístiku.

Iha 31 Outubru 2026, Prezidente Autoridade Munisipál Vikeke mós apela ona ba administradór postu administrativu na’in-lima no xefe suku na’in-38 atu halo monitorizasaun ba projetu infraestrutura PDIM ne’ebé implementa iha sira-nia área. Nia enfatiza katak autoridade komunitária sira tenke asegura servisu konstrusaun la’o tuir planu no kumpre padraun kualidade.

Iha sorin seluk, konstrusaun Sentru Saúde Internamentu Uatulari hahú iha Jullu 2026, liuhusi empreza Lekduadyti Unipessoal, Lda., ho orsamentu US$43.227,91. Fasilidade saúde ne’e sei kompostu hosi sala emerjénsia, sala internamentu ba adultu, sala pediatria no sala maternidade, atu fasilita asesu komunidade Uatulari no Uatukarbau ba servisu saúde. Tuir informasaun husi Diretór Servisu Saúde Munisipál Vikeke, Aljaksono S. Maia, obra ne’e tuir planu sei ramata iha 31 Janeiru 2027.

Klik notísia relevante sira iha kraik hodi lee:

1. Autoridade Vikeke implementa projetu PDIM 14 prioriza ba irrigasaun-sítiu turístiku – TATOLI, 9 Maiu 2026.
2. PAM Vikeke apela ba Autoridade Suku halo kontrolu ba programa infraestrutura – TATOLI, 31 Outubru 2026.
3. Obra Sentru Saúde Internamentu Uatulari hahú faze konstrusaun – TATOLI, 24 Agostu 2026.
4. Lista projetu infraestrutura iha Munisípiu Vikeke – Ministériu Obras Públikas.

Jornalista: Vitorino Lopes da Costa

Editór: Xisto Freitas da Piedade