Parlamentu ajenda atu diskute proposta Lei Siberseguransa
DILI, 05 Novembru 2026 (TATOLI)-Parlamentu Nasionál prioriza diskusaun ba proposta Lei Siberseguransa ne’ebé Governu aprezenta ona, tanba importante tebes ba prosesu transformasaun dijitál no seguransa iha setór dijitál nian, hodi kontrola di’ak liután jogu scame online ne’ebé daudaun sai preokupasaun.
Meza Parlamentu Nasionál tau ona ajenda atu halo diskusaun ba proposta Lei Siberseguransa depoizde ramata diskusaun ba proposta Orsamentu Jerál Estadu (OJE) 2027 iha fulan-Dezembru tinan ne’e.
“Ida-ne’e husik [diskusaun] orsamentu liu tiha”, Prezidente Parlamentu Nasionál, Maria Fernanda Lay, hatete iha Parlamentu, ohin.
Iha loron 31 Jullu 2026, Governu submete ona projetu Proposta Lei ba Parlamentu Nasionál neʼebé husu autorizasaun lejizlativa hodi aprova pakote lejizlativu integradu ida kona-ba siberseguransa, neʼebé kobre krime no prosesu kriminál sira iha ámbitu dijitál no definisaun rejime jurídiku siberespasu nasionál.
Inisiativa ne’e ho objetivu atu fó ba Timor-Leste enkuadramentu jurídiku ida-neʼebé modernu no koerente hodi hatán ba aumentu ameasa sira iha espasu sibernétiku, atu nune’e bele hametin kapasidade Estadu hodi prevene, investiga, kombate no hamenus kriminalidade informátika, proteje infraestrutura krítika sira, nomós promove ambiente dijitál ida ne’ebé seguru liu ba sidadaun.
Notísia relevante: Governu submete ba Parlamentu proposta pakote lejizlativu siberseguransa
Jornalista: Nelson de Sousa
Editora: Maria Auxiliadora
