Tribunál aplika Prizaun Preventiva ba aman taa mate oan iha Samalete Ermera
DILI, 05 Novembru 2026 (TATOLI)–Tribunál Judisiál Primeira Instánsia Dili (TJPID) halo interrogatóriu dahuluk ba kazu omisídiu iha área Samalete, Postu Administrativu Railaku, Munisípiu Ermera ne’ebé akontese iha loron Kuarta (19/10), ne’ebé aman taa mate nia oan feto rasik.
Ministériu Públiku liuhusi Prokuradór Ricardo Leite, iha interrogatóriu dahuluk ne’e promove arguidu ho krime omesídiu agravadu no violénsia doméstika ne’ebé konjuga ho krime arma branka husi Dekretu-Lei 5/2017 Lei Rejime Jurídiku Arma Branka no Prátika ba Arte-Marsiál.
Durante interogatóriu dahuluk ne’e arguidu JD hili direitu ko’alia. Nune’e, Ministériu Públiku husu atu aplika Prizaun Preventiva tanba arguidu nia hahalok ne’e rezulta nia oan rasik mate.
Notísia relevante : TJPI-Suai aplika prizaun preventiva ba arguidu deskonfia komete kazu omesídiu iha Ainaro
Defeza JD, Advogadu Privadu José da Silva husu ba Tribunál atu aplika Aprezentasaun Períodika ba arguidu tanba nia hahalok ne’e mós la’ós diretamente nia hakarak, maibé asaun ne’e halo husi matebian rasik ne’ebé ho nervozu.
Hafoin ne’e, Juíz Turnu Nasson Sarmento hatun despaisu hodi aplika Prizaun Preventiva ba arguidu.
Hafoin prosesu interogatóriu dahuluk ne’e, arguidu nia Defeza José da Silva, hateten, Tribunál hasai despaisu hodi aplika medida Prizaun Preventiva ba arguidu tanba halo asaun taa dala-tolu ba vítima Dalia Dias Mouzinho iha parte oin, kotuk laran no ulun.
Advogadu haktuir, molok ne’e vítima foti tudik sona nia aman hodi rezulta kanek grave, nune’e Ambulánsia transporta kedan bá Ospitál Nasionál Guido Valadares iha Bidau hodi halo tratamentu. Tanba ne’e, JD ohin foin halo interrogatóriu dahuluk ba kazu ne’e tanba arguidu momentu ne’ebá mós kanek.
Hafoin despaisu Tribunál, Polísia Komandu PNTL Munisípiu Ermera ezekuta despaisu hodi lori kedan arguidu JD kumpre Prizaun Preventiva iha estabelesimentu Prizaun Bekora.
Jornalista : Natalino Costa
Editora : Julia Chatarina
