Embaixadora Caitlin despede PM Xanana hafoin termina servisu diplomata iha TL
DILI, 06 Novembru 2026 (TATOLI)—Embaixadora Austrália ba Timor-Leste, Caitlin Wilson, halo enkontru despedida ho Primeiru-Ministru, Kay Rala Xanana Gusmão, hafoin termina ninia mandata diplomata durante tinan tolu fulan neen iha Timor-Leste.
Embaixadora Austrália ba Timor-Leste, Caitlin Wilson, hateten ohin nia halo enkontru despedida ikus ho Primeiru-Ministru Kay Rala Xanana Gusmão, tanba ninia mandatu diplomata ramata ona iha Timor-Leste.
“Nu’udar Embaixadora, ha’u sente onra no priviléjiu boot tebes tanba bele servisu hamutuk ho Governu Konstitusionál da-sia (IX) durante tinan tolu liu, ne’e nu’udar períodu ida-ne’ebé importante tebes no marka istória iha relasaun entre Austrália no Timor-Leste,” Embaixadora ne’e relata ba jornalista sira iha Palásiu Governu, ohin.
Nune’e nia sente onra no priviléjiu boot tebes tanba esperiénsia ida-ne’e, maske agora tempu to’o ona ba nia atu kontinua ba etapa foun iha ninia servisu profisionál diplomata
Aleinde ne’e, nia mós sente triste atu husik Timor-Leste tanba Timor-Leste sei nafatin iha ninia laran no nia sei lahaluha Timor-Leste no esperiénsia furak ne’ebé nia hetan iha nasaun ida-ne’e.
Embaixadora hatutan durante períodu ne’e hanesan ita hotu hatene, relasaun entre nasaun rua kontinua dezenvolve no sai forte liután, ho dezenvolvimentu importante balun, inklui kona-ba projetu Greater Sunrise, no iha área sira seluk ne’ebé ita servisu hamutuk no halo kooperasaun besik.
“Hanesan iha tinan ida-ne’e, ita simu vizita istórika hosi Primeiru-Ministru Austrália, Anthony Albanese, no asina akordu Parseria Foun ba Era Foun (New Partnership for a New Era). Akordu ne’e simboliza pasu foun ba oin no hametin liután ita-nia servisu no kooperasaun hamutuk,” nia dehan.
Nia afirma, buat ne’ebé importante mak nu’udar nasaun viziñu maibé liuhusi ne’e, nu’udar belun, amizade no parseria ne’e sei kontinua dezenvolve no sai forte liután iha tinan sira mai entre ita-nia nasaun rua liuliu ho Embaixadór foun ne’ebé sei to’o iha Timor-Leste.
Jornalista : Alexandra da Costa
Editór : Cancio Ximenes
